官僚帶頭倒廚餘 回收政策多舊魚
港府早前煞有介事推出「桌上零廚餘」運動，太一叮初時真係抱有少少期望㗎，你知啦，官老爺處理垃圾問題廢到無倫，擴建堆填區計劃被人棄置堆填區，興建焚化爐大計又火頭處處無晒影，如果再唔減少垃圾，減少廚餘，垃圾圍城嘅預言話唔定好快噩夢成真㗎！
廚餘回收工作結果做成點呢？梗係做到垃圾一樣啦！叮佢個鎯鎯，港產官僚自己都係大量傾倒廚餘嘅環保敗家仔，試問點可能成功推動零廚餘運動呢？
頭號環保敗家仔叫房屋署，轄下十八個街市、六個熟食檔居然無任何廚餘回收設施或者政策。佢哋話喎，大規模廚餘回收需要投放大量資源配合，所以需要慎重考慮喎。叮！空置公屋夠浪費大量資源啦，又唔見房署官僚話慎重處理？同廢官講環保，簡直嘥氣。
二號環保敗家仔叫食環署，情況叫做比房屋署好少少，有自設廚餘堆肥機將轄下街市嘅部分廚餘原地轉化堆肥，不過得一部咁大把，家陣喺黃大仙大成街街市以試點形式試行。喂，食環署轄下有一百零二個公眾街市，包括二十五個熟食市場，但只係得一部廚餘堆肥機，咁咪即係聊勝於無？唔怪得港產官僚成日被人話搞環保當做騷啦，根本唔係實實在在為拯救地球先生出力。
至於三號環保敗家仔，諷刺咯，係環保署。話說環保署同工商界合作，喺街市、商場、酒店進行廚餘回收試驗計劃，點知原定明年啟用嘅小蠔灣廚餘處理廠爛尾，押後至一六年至投入運作，結果有關機構參與咗三個月就打回原形，大部分已煞停廚餘回收工作。即係話，因為環保署失職，間接令大量廚餘倒番落堆填區。
唉，一句講晒啦，港產官僚無身體力行做好廚餘回收工作，減廢政策淪為一紙空談！試諗吓，港府呢頭叫人桌上零廚餘，嗰頭自己街市多廚餘，熟食檔倒廚餘，咁樣推動廚餘回收，多鬼餘啦。港府唔以身作則，反而一味打市民荷包，徵收環保稅項，你話係咪捨本逐末，抵打有餘吖？
話時話，港府推動源頭減廢其身不正，點止傾倒廚餘咁簡單。本報早前踢爆，港府開口埋口叫市民做好廢物回收，點知政府部門根本無訂定廢料回收指引，任由外判商一車車將有用廢料棄置堆填區，問你服未！
一句講晒，官僚帶頭倒廚餘，回收政策多舊魚。事實好清楚，若要桌上零廚餘，先要港府零官餘，將嗰啲廢官僚直接送去堆填再講啦，叮！
