記得當局有段推廣旅遊嘅宣傳片，主題係「熱情香港，好客之道，點少得你」，講到香港人待客以誠，令旅客賓至如歸咁款。不過咁，現實往往係殘酷嘅，旅客未享受「好客之道」，隨時領教「劏客之道」，真係多謝夾盛惠嘞。
話說有個歐洲男遊客搭飛機來港，喺機場打的去紅磡一間酒店，到達酒店時，的士司機居然話車費要八千蚊，呢位遊客不虞有詐照畀，事後覺得唔對路向酒店職員查詢至知畀人呃，可惜呢個時候黑的已去如黃鶴，想追都追唔番。大拿拿八千蚊，隨時貴過歐洲來回香港機票，呢趟旅程嘅代價真係大囉。
話時話，查實類似嘅劏客手法屢見不鮮，已經唔係乜嘢新聞。呢，上個月就啱啱發生過一單，有市民喺網上留言，聲稱其外地友人來港開會，喺機場搭的士到尖沙咀，點知一起錶已經係四百五十蚊，駛到青馬大橋時，咪錶已經跳到六百幾蚊，到達目的地居然超過八百蚊，個價錢幾乎可以行勻全香港，唔係明搶係乜呀。
正所謂，好事不出門，醜事傳千里，可以想像，旅客被人當羊牯，谷到一肚氣返到祖家，唔周圍唱衰香港至奇。所以話，港府監管不力，執法不嚴，搞到香港臭名遠揚，無論花幾多錢去外國宣傳，或者成立乜嘢旅遊配對基金都冇用啦。
開講有話，的士係一個城市嘅「名片」，而的士司機就係旅遊形象大使。講句公道話，全港有數以萬計的士司機，難免樹大有枯枝，劏客嘅不法分子始終都係一小撮嘅啫，問題係一粒老鼠屎搞壞一鍋粥，即使係一單半單，已經足以損害的士行業甚至成個香港嘅聲譽。
其實，黑的劏客由來已久，要解決問題，固然要靠的士業界自律，但當局亦係責無旁貸。都係嗰句，治亂世須用重典，如果警方加大力度從嚴執法，多啲放蛇，試問呢班無良司機又點會咁猖獗吖。
最令人閉翳嘅係，近年激進組織頻頻粗暴趕客，搞到旅遊業半死不活，香港「好客之都」一早淪為「趕客之都」。家陣加上黑的劏客，雪上加霜，衰到變成「劏客之都」添，仲邊有人會山長水遠嚟香港貼錢買難受吖。
計太一叮話齋，黃台之瓜，不堪再摘，如果當局繼續坐視不理，「劏客之都」遲早再降呢為「鬼城酆都」，到時真係搵鬼嚟咯，叮！
第一手消息請下載on.cc東網
