粵港主客易位 合作有名無實
風水輪流轉。以前講親粵港合作，廣東省必定係比較積極嘅一方，家陣粵港合作早就變成廣東唔急香港急。呢，淨係過去嘅港粵合作變成家陣嘅粵港合作，就知道主客易位，香港被邊緣化喇。
一年一度嘅粵港合作聯席會議尋日喺香港舉行，睇吓港府高官幾乎傾巢而出，就知佢哋幾咁重視今次會議嘞。港府高官話喎，粵港兩地同為國家發展策略「一帶一路」嘅重要接點，要加強合作，發揮香港一國兩制嘅優勢。而廣東省領導人亦大送高帽，形容粵港為「好鄰居」同「好兄弟」，讚揚香港航運中心地位可以幫助推動自貿區建設，雙方仲簽署五份合作協議添。表面睇，雙方例牌勾肩搭背，稱兄道弟，其實大家都知道，香港優勢所餘無幾，所謂加強合作，不過係客套話咋。
唔係長他人志氣，滅自己威風o架，粵尊港卑已經係不爭嘅事實。香港由回歸之初佔全國經濟總量約五分之一，跌至今日不足百分之三，重要性早就大不如前。單係深圳市，唔止綜合競爭力超過香港，貨櫃吞吐量超過香港，預計經濟總量今年亦會全面超越香港添。仲有呀，廣東自貿區一旦發展成熟，即係再造幾個香港，仲使乜同香港合作喎。
老實講，除咗金融業，內地各方面都已經超越香港，雖然粵港聯席會議年年照開如儀，其實早就變成官式酬酢，有姿勢無實際。不過咁又怪得邊個吖，港府議而不決，決而不行，淨係港深合作發展河套區咋，講足十幾年，至今依然無影無蹤，咪就係港府蹉跎歲月嘅最佳證明囉。難怪深圳拒絕再等，寧願另起爐灶，獨力發展前海金融區好過。
學似有人話齋，香港仲係以前嘅香港，但外面嘅世界早就已經改變，唔同以前，可惜唔少香港人仲自我感覺良好。冇符喇，當周邊地區一心一意發展經濟，香港就一味沉迷政治爭拗，內鬥內耗，逢中必反，就算廣東願意同香港合作，中央政府願意送錢上門，港府無法子排除政治阻力，一樣嘥氣嘅啫。
講到尾，都係港府無能。成日話香港要發揮「超級連繫人」嘅角色，成為國內外「走出去、引進來」嘅平台，講就好聽咯，實際上做過啲乜呢？最弊係被民粹牽着鼻子走，一時限奶令，一時要求收緊一簽多行，中港好似水溝油咁，想合作都幾難喇，叮！
