「一年容易又中秋，有人歡喜有人愁。」查實呢一年港人過得真係唔易，一場佔中之亂搞到個個都愁，唯一最歡喜嘅，就係嗰班搞亂香港嘅牛鬼蛇神。呢嗱，好快就佔中一周年嘅喇，主要搞手及幕後黑手至今仲未「落鑊」，殺人放火金腰帶，佢哋印印腳等食月餅，唔開心就假咯。

陳健民（左）與戴耀廷承認佔領行動失敗，暗批學生太遲退場。

多得政府玩放生，兩個佔中禍首戴耀廷及陳健民日前鬆毛鬆翼，承認整個運動就爭取制度改革而言係失敗，但佢哋竟然將個鑊卸落俗稱「雙學」嘅學聯和學民思潮身上，話衰在運動未能提早結束及領導鬆散，仲表明唔認同部分學生提出嘅「以武制暴」咁話喎。

冇錯，隨着社會愈來愈政治化，部分年輕人愈來愈激進，郁吓就話要佔領，要衝擊，有啲仲勇武到去製造炸彈添，但究竟係邊個激起年輕人嘅火氣呢？咪就係呢班敢做唔敢認嘅偽君子囉！

最難頂嘅係，戴耀廷可能聞到燶味，竟然語帶恐嚇話如果佢因為佔中而失去教席，大學及校委會需要向香港以至國際社會交代喎，擺到明威脅港大唔可以炒佢魷魚喇。想當初，佢向全世界宣布一力承擔「公民抗命」嘅後果，不請律師，不抗辯，一副「風蕭蕭兮易水寒，壯士一去不復還」咁款，點知到頭來竟然驚打爛飯碗，你話係咪虛偽吖？係咪反口覆舌吖？

不過咁，講到虛偽及反口覆舌，就不能不提淫賤黎喇。佢唔止係佔領之亂嘅最大金主，而且扮「總指揮」，至今咪一樣逍遙法外。淫賤黎揚言唔怕坐監，最怕判社會服務令要洗廁所，其實弦外之音，咪預示有司法機構包庇，有外部勢力撐腰，實唔會落鑊受靶囉。逃避責任都算嘞，淫賤黎仲譏諷班學生「戇居」，遲遲唔肯撤退。嗱，呢啲咪叫「反轉豬肚」囉，淫賤黎都靠得住，豬乸上月球都有之呀！

計太一叮話齋，呢班蛇蟲鼠蟻之所以咁招積，連「政治主教」陳日君都大講風涼話，對自己逍遙法外感到「慚愧」，全因為睇穿港府底牌，凡涉及外部勢力，港府一定退避三舍。冇辦法啦，家陣連阿爺見到洋人都跪低啦，何況港府呢隻病貓，旨意佢哋去捉老鼠，簡直天方夜譚啦！

無論點都好喇，法治係香港嘅核心價值，如果當局繼續姑息養奸，包庇妖孽，睇怕法治招牌都要拎去當垃圾堆填都得咯，叮！