香港自詡國際大都會，仲話同紐約、倫敦齊名添，點知竟然爆出食水含鉛醜聞，港府甚至連「鉛從何來」都矇查查，簡直係國際大笑話。「東方報業民意調查」顯示，受訪市民一面倒批評港府監管食水安全不力，係鉛禍愈鬧愈大嘅罪魁禍首。

鉛水風波自七月初爆發至今，一發不可收拾，家陣已有十多條屋邨中招，而且蔓延至大、中、小學、幼稚園同埋醫院，連豪宅都不能幸免。最弊嘅係，唔止愈來愈多幼童被驗出血鉛超標，連成年人都有份，搞到人心惶惶。大部分受訪者直斥港府一味頭痛醫頭，見步行步，事件點可能有平息嘅一日吖。

咁又係呀，面對鉛禍威脅席捲全城，港府唔係急市民所急，反而歎慢板。呢，好似調查咁吖，初時係威係勢，交由水務署、房委會及特首委任嘅獨立委員會兵分三路進行，點知有頭威冇尾陣，調查有如泥牛入海，冇晒下文。淨係特首委任嘅獨立委員會咋，居然拖到下個月底先至進行首次聆訊，報告係咪可以喺九個月內完成，真係無人知。

最匪夷所思嘅係，當局連為學校驗水咁簡單嘅事都搞到一塌糊塗。大家都知，兒童長期飲用鉛水後果可大可小，隨時影響智力發展，點知教育局拒絕為學校驗水之餘，仲無厘頭叫學校教導學生正確飲水態度喎，簡直係火上加油，被市民鬧爆，當局至跪低為學校驗水，難怪大部分受訪者批評官僚無能，進退失據喇。

咁都未夠衰吖，更弊係連補救措施都唔湯唔水。當局係就係為受影響屋邨鋪設臨時供水系統，點知供水系統本身都有問題，出水唔係嘔白泡，就係黃黚黚，結果居民得物無所用。至於當局當日拍晒心口要求承建商為居民換喉，家陣一樣不了了之。絕大部分受訪者要求港府盡快檢討食水監管程序，加快進行補救措施，否則鉛禍沒完沒了，真係一啲都冇講錯o架。

正所謂，萬邦有罪，罪在朕躬，鉛水事件港府責無旁貸o架。嗱，已經有公屋承建商承認犯下「無知錯誤」，對採購焊料監管不力，加上本報早前化驗坊間常用焊料，結果亦發現含鉛量超標。「鉛兇」呼之欲出，當局仲唔做嘢，仲要等幾時呢？咪以為減收水費呢啲小恩小惠可以蒙混過關，一日唔正本清源，民怨只會愈演愈烈嘅咋，叮！