曼聯英超又輸波，唔只魔躉失望，就連名宿白賴仁笠臣都擰晒頭。呢位曼聯一代中場指揮官尋日應香港賽馬會邀請出席「香港賽馬會北區中學女子七人足球聯賽」開幕禮，佢坦言曼聯喺前晚輸畀阿仙奴場波「踢得曳」，但無損爭標信心。

笠臣落場大騷
秀麗腳法。

珍貴大合照

粉絲攞簽名

寶刀未老食「大四喜」

58歲嘅笠臣寶刀未老，昨朝到訪沙田基督書院粉墨登場，喺4對4小型足球賽連省4粒，令一班學生哥拍爛手掌。但曼聯鋒將喺前晚英超淨吞阿仙奴3蛋一役就顯得失色，喺香港睇直播嘅笠臣亦擰晒頭：「曼聯初段未入局，比賽喺30分鐘幾乎完結。作客面對阿仙奴，唔可能咁早將控球權交畀對手。好在聯賽有排踢，家陣講爭標仍言之尚早。」

馬不停蹄嘅笠臣下晝再到上水嘅聖公會陳融中學，同一班足球女小將踢4人足球賽，腳下功夫冇生疏嘅佢笑言平時都會踢「衞生波」止技癢，但最重要係透過「騷哥利」，讓一班香港小將體驗足球樂趣，從馬會與曼聯合作嘅青訓課程，為香港足球育苗。儘管曼聯近年自家青訓產品唔多，笠臣睇好今季加盟嘅「新亨利」安東尼馬迪爾，可繼續發光發亮：「馬迪爾連場精彩表現已證明咗佢嘅能力，佢將會係曼聯嘅未來。」圖/文：徐嘉嘉、植詠珊