孔夫子話,「因材施教,有教無類」,可惜香港早就冇呢支歌仔唱咯。只要睇吓自資院校開到成行成市,教學質素及經營手法備受詬病,就知道教育早就淪為一盤生意,學校已經變身學店,話係「因財施教,有錢無類」就差唔多。

冇誇張o架,本港資助大學學位爭崩頭,即使分數達到入學門檻,一樣有大把學生被拒諸門外。為咗買個保險,唔少學生都會喺聯招放榜前報讀自資課程「補底」,點知呢種買保險心理竟然成為自資院校另類搵錢途徑,真係唔到你唔服。

係咁嘅,現時報讀自資院校必須繳交約五千元留位費,部分院校仲會喺短時間內要求學生繳交首期學費添,簡直未見官先打八十。畀錢都係其次,最慘係學生即使最後獲得大學取錄,放棄自資院校學位,都不獲退回留位費及學費。有個案出動到家境清貧、父母失業甚至破產為理由,一樣無情講,涉款最大嘅個案更高達五萬七千多元,你話咁樣同趁火打劫有乜分別吖?

冇錯,大部分院校都自稱有退款安排,查實只有獲得八間資助大學取錄嘅學生至可以獲發部分退款,擺明取巧啫。淨係舊年咋,全港自資院校合共收取逾一億五千萬元留位費,而拒絕退還嘅「淨袋」留位費亦接近二千萬元,加埋學費等收入,整體累積盈餘超過四十億元,簡直肥到襪都着唔到,令人咋舌。

大家可能會問,乜教育局無規管嘅咩?冇錯嘞,自資院校話就話受《專上學院條例》監管,但由於自負盈虧,行政及財政運作同無王管冇分別。正如立法會議員話齋,自資院校嘅退款機制欠透明,對學生唔公平,教育局一味袖手旁觀,根本係不負責任。咁又係呀,家陣連幼稚園都設有學費上限喇,有乜理由自資院校收費可以亂咁嚟喎。

講起自資院校無王管亂象,大家一定記得,兩年前嶺南大學社區學院及持續進修學院爆出超額收生醜聞,當時教育局係威係勢話要研究規管自資院校,結果研究復研究,到家陣都係得個吉。所以話,無良學店誤人子弟,教育局絕對係助紂為虐。

一日最衰都係前朝貪曾政府,發展所謂教育產業,其實將教育當係一門生意,先至埋下今日嘅禍根。可能教育局都知衰啩,聲稱會同自資院校商討協調收費問題,咁就講多無謂,行動最實際喇,叮!