講句粗口都要拉 反智惡法添煩亂

之不過，時移勢易，如果今時今日袁大將軍喺香港講同一句說話，咁又唔同效果喇，隨時觸犯《公眾地方內擾亂秩序行為》條例都似，最高刑罰係罰款五千元及監禁一年，問你怕未！

唔係講笑（o架），前排有位市民去送機，因朋友被航空公司嘅地勤人員留難，挺身而出幫朋友理論，一時激動講咗句粗口。點知對方小題大做，打九九九報警，警員了解後雖然冇立案，但搞咗成半粒鐘，乜興都掃晒啦。

相信好多人唔知，原來喺公眾場所，包括醫院、航機、巴士、渡輪及鐵路，都有附例或條例規管唔准講粗言或侮辱性嘅說話。○七年之嘛，有個後生仔喺港鐵車廂傾電話，由於唔覺意夾雜幾句粗口，卒之罰咗六百蚊，簡直係無妄之災，冤哉枉也！

即係咁，講粗口當然唔好，問題係，好多公共交通工具冇貼禁止講粗口告示，即使有貼，字體仲細過蚊螆，用放大鏡都睇唔到寫乜，叫人點樣遵守呀。正如有學者質疑，相關條例只係由職員或執法人員決定檢控，由於條例唔清晰，容易出現雙重標準，隨時畀人濫用，變成冤假錯案。

冇錯嘞，「法例係死嘅，人係生嘅」，對於粗口嘅定義，邊個可以界定清楚呢？例如咁吖，有人喺公眾場合爆句「小狗懶擦鞋」，如果執法人員斷定係疑似粗口而告上法庭，盞口同鼻拗，唔止難為法官，直情審死官喇！

仲有吖，如果當事人講嘅係外語，或者係方言，只要無人聽得明，就算爆粗都可以逃過法網。即係話，瓦努阿圖人講瓦努阿圖粗口，埃塞俄比亞人講埃塞俄比亞粗口，聽唔明就唔當係粗口，你話呢啲法例係咪搞笑吖？為公平起見，睇怕所有執法人員都要再培訓，唔通曉百幾種語言或方言，要立即革職，以免有人爆粗都唔知，法例變成一紙空文！

查實喺香港地，呢類擾民廢法真係多不勝數，平機會嘅《歧視條例》已經夠晒反智，添煩添亂，勢估唔到連講粗口都要拉要鎖咁大劑。

計太一叮話齋，今日香港已經夠亂，港產官僚與其成日阿茂整餅，冇嗰樣整嗰樣，不如學袁崇煥話齋，「頂硬上」做啲正經嘢好過啦，叮！