學校係社會嘅縮影，真係冇講錯o架。成個香港烏煙瘴氣，每況愈下，大學亦唔會好得去邊，喺國際及地區排名跌跌不休，你話係咪累鬥累吖。

嗱，上海交通大學世界一流大學研究中心同最好大學網公布「2015年兩岸四地大學排名」，北京清華大學連續五屆蟬聯榜首，台灣清華大學及台灣大學維持第二及第三名，而香港嘅大學就瞠乎其後，中文大學就算上升兩位亦只排第五名，香港大學更加排到第六名，簡直相形見絀。

其實，香港嘅大學畀競爭對手比下去，已經唔係新聞。日前國際高等教育及人力資源研究機構Quacquarelli Symonds公布今年世界大學排名榜，新加坡國立大學上升十名至全球十二位，蟬聯「亞洲一哥」，新加坡南洋理工大學及內地清華大學分別以全球排名十三及二十五位，成為亞洲第二及第三位，而香港科技大學雖然排名急升，但亦只排第二十八位，港大更加下跌兩名至第三十位，痛失本地一哥地位添。

如果話，考試可以評估學生嘅學習有冇進步，咁呢兩份大學排名榜就係成績表，將本地大學嘅窘境表露無遺。一方面，本港大學整體質素下降，排名落後於人，唔止同新加坡等國際化城市冇得比，甚至畀內地拋離九條街，講出嚟都丟架。另一方面咯喎，港大嘅表現可以話係出類拔「衰」，成為退步學府中最不堪嘅一個。唔係咩？港大係百年老校，向來被視為本地最高學府、龍頭大學，以前幾威水o架，點知家陣紛紛畀中大及科大等爬頭，淪為衰落最快學府、排名插水大學，叫人情何以堪。

禍福無門，惟人自招。近年政治化入侵校園，大學幾乎無一幸免，但係港大係人所共知嘅重災區，排名跌得最甘係好正常嘅。大家有眼睇，港大唔止成為泛民政客嘅橋頭堡，更加淪為佔領行動嘅大本營，有人收受政治黑金，有人鼓吹違法阻街，有人變身街頭鬥士，法律系副教授戴耀廷更加係佔領搞手之一，大搖大擺「讓恨與暴力佔領校園」。大學排名計分以科研水準及師資質素做基礎，港大上下唔係醉心學術研究，而係醉心政治鬥爭，排名唔跌到趴街至奇喇。

教育成敗關乎社會未來，大學排名跌跌不休，香港點會有運行吖？不過話番轉頭，如果係「搞政治」或者「搞搞震」排名，港大認咗第二，一定冇人敢認第一吖，叮！