學校安排驗水 高官更要驗腦

好似鉛水風波咁吖，爆發至今已經超過兩個月，對於源頭何在，如何善後，港府仲係一頭霧水，特別係人稱「唔得掂」嘅教育局局長吳克儉，直頭好似盲頭烏蠅咁，方寸大亂。一開頭耍手擰頭，堅拒為學校驗水，跟手改口學校驗水唔係問題，但要留意驗水嘅時間、方法係咪準確，最後迫於民意壓力，至死死氣宣布優先為全港近千間幼稚園驗水，截至目前，約九百間回覆要求檢驗，預計最快一至兩星期開始相關工作。另外，有百多間幼稚園要求安裝濾水器。

嗱，呢啲咪四方木——踢一踢，郁一郁囉。係人都知，小朋友長期飲用鉛水，可能影響智力發展，後果好嚴重（O架）。再講吖，陸續有兒童被驗出血鉛超標，部分甚至出現發展遲緩問題，家長憂心如焚，教育局拖到依家至幫學校驗水，遲唔遲啲吖。

即係咁，遲到好過冇到，家陣最大嘅問題係，已經有唔少學校中招，當局有冇善後方案？教育局話喎，會為安裝濾水器嘅學校提供津貼，又會將驗水範圍擴展至二○○五年或以後落成嘅八十間中小學校。

喂，咁就當交咗差？有冇再敷衍啲呀！如果濾水器可以保證百分百安全，當局之前就唔使向受影響居民派蒸餾水，更加唔使咁辛苦追查源頭，索性一次過全港學校安裝咪得囉。更何況，受鉛水威脅嘅點止淨係學校呀，大家有眼見，鉛水大廈愈揭愈多，新樓、舊樓、屋邨、豪宅無一幸免，連醫院都出事，當局驗啲唔驗啲，連補鑊都唔湯唔水，簡直匪夷所思。仲有吖，學校鉛水超標咁得人驚，家長實會要求為子女驗血，當局又有冇預留足夠資源呢？

咪話太一叮唔提醒，鉛水問題牽一髮動全身，公屋興建速度已經嚴重滯後，加上鉛禍拖累，肯定慢上加慢，輪候隊伍長上加長；唔好唔記得，家陣大把基建項目排住隊上馬，分分鐘因為咁樣拖慢進度（O架）。

喺度不妨再贈港府一句古人明訓︰「治病必求於本。」與其無止境檢驗大廈，不如捉班官老爺去驗，睇吓係咪鉛水飲得多影響智力都好吖嘛。總而言之，一日官僚唔換腦，一日鉛禍難解決係啦，叮！