圖書館藏老古董 康文署食古不化
考考大家,知唔知咩係5.25吋磁碟?好多年輕人可能一頭霧水,咁又難怪嘅,5.25吋磁碟係七十年代嘅電子產物,容量只有160kB,一張相都放唔落,早就被淘汰咯。
不過咁,如果你去公共圖書館,仲可以見識呢啲老古董,唔使去博物館。原來康文署每年花費五千萬元添置新書嘅同時,任由過時館藏發霉,包括唔少超過二十年歷史嘅電腦磁碟。好似一套教人用Word嘅錄影帶咁吖,附有兩張分別為5.25吋同3.5吋磁碟嘅附件,記者向職員查詢,對方幾乎反轉成個圖書館,幾經辛苦至搵到呢兩件「文物」,點知5.25吋嗰隻磁碟根本冇電腦可以讀取,而3.5吋磁碟雖然讀到,但就無法開啟檔案,得物無所用。
咁都未算吖,記者借閱另一套有聲書錄音帶,音質非常之差,聲音時大時細,無法聽清內容。而有啲舊書雖然可以喺圖書館電腦系統搵到,其實已經失蹤多時,問你服未。
即係咁,家陣係互聯網世代,好多舊資料固然應該淘汰,但亦有唔少舊館藏值得保留。正如有學者話齋,圖書館館藏不斷增加,部分舊資料無法以現今器材讀取,康文署應該諗吓點樣將館藏數碼化。冇錯嘞,將館藏數碼化,一來可以慳地方,二來可以保存得更耐,而且一啲都唔難,好多私人企業早就將舊檔案換成新版本,唯獨康文署食古不化,幾十年如一日。
話時話,康文署管理圖書館甩甩漏漏,早就唔係新聞。審計署曾揭發該署自○○年接管公共圖書館以來,七年都冇點算過館藏。仲有吖,過去幾年圖書館每季注銷嘅書籍超過十六萬本,大批新簇簇書籍直接當廢紙丟棄,唔止浪費公帑,更加破壞環保,簡直罪過。
講開又講,公共圖書館借閱量近年不斷下跌,除咗反映港人閱讀風氣淡薄,亦因為好多書本電子化,一機在手就可以博覽群書。公共圖書館話就話擁有超過十四萬項電子書,弊在康文署宣傳不力,無乜人知道呢項「德政」。最匪夷所思嘅係,圖書館讀者人數買少見少,開支反而年年增加,唔怪得有人形容康文署係倒米壽星,專同納稅人作對。
點都好喇,時代不斷進步,科技日新月異,做人又好,做官又好,最緊要與時並進,否則,好似港產官僚咁,一本通書睇到老,施政有乜法子唔烏龍百出吖,叮!