「雖然我哋講咗好多負面嘅IT（資訊科技）教學例子，但都有正面經驗嘅。」朋友A續說，「班上有幾位讀寫障礙嘅學生，做討論工作紙有困難，但係用iPad佢哋就可以用把口講清楚自己諗乜，唔使次次要同學仔代勞寫，佢哋都多咗開口。」
朋友C說：「我試過教一啲複雜嘅平行線與角，用電腦將幾個重疊嘅線同角度分開做幾個圖層，有助對幾何冇咁叻嘅學生嘅理解。」
我：「我教法國大革命時，試過要求學生代入不同階層人士，做一齣示威話劇。佢哋用電腦做資料搜集同寫劇本，但係自製嘅道具就好土炮。我拍低演出，剪完片畀翻班細路睇，佢哋睇得好開心。用DV算唔算係IT教學？」ABC聽畢，連連點頭。
「局長先生常說『資訊科技教育能加強學與教的效能及全人教育』，畀人感覺就係IT教學係萬能。」朋友B指出，坊間論述、甚至學校之間的競爭，也把資訊科技多寡看成為優質教育的指標，這與實際IT教學的目的與應用有極大出入。資訊科技教學成效如何，歸根究柢還是要靠同工努力。
80後miss Siu
第一手消息請下載on.cc東網
