東網電視
更多新聞短片建制派尋日開會討論立法會最後一個會期各委員會正、副主席安排，隨後出席與特首梁振英嘅飯局。據知建制派已決定唔會擸盡所有委員會正、副主席，仲表明有啲位唔會同泛民爭。對於內務委員會副主席「內副」由邊個出任，建制派屬意衞生服務界議員李國麟出任，惟泛民主派則希望係白鴿黨嘅「單雞」單仲偕或公文袋嘅「袋巾傑」梁家傑二揀一，建仔前主席譚耀宗會後透露，建制派仲未決定由邊位泛民議員出任，原因係唔少建制派對單梁二人持有唔同意見，希望搵到一個多啲人同意嘅人選先再考慮，否則可能改由建制派派人出戰。
點解單雞同袋巾傑被彈票呢？最新發展竟然有人提名社福界議員張國柱「升呢」，仲話一旦佢做內副一定會「開綠燈」。綜合多方消息指出，雖然早前有傳建制派願意接受單雞出任內副，惟仍有部分人覺得對方太激，反指倘若由李國麟或張國柱出任就無問題，另外有人再次為建制派揀內副如此挑剔解畫，表明最顧慮就係有人做內副後故意漏料，如果係咁好難同政府傾得深入。
對於突然「被提名」做內副，張國柱接受查詢時話感到好驚奇，除咗話無聽過呢個消息之外，又表明唔會做內副，原因係經驗不足，加上已到最後一個會期，自己希望一心做好福利事務工作，留番多啲時間畀身體休息。咦！似乎又一次係「神女有心，襄王無夢」嘅局面嚟喎。
陳健波掌財會即拉票
相反被視為燙手山芋嘅財務委員會主席一職人選揭盅，保險界議員陳健波一如所料獲支持出任，據知佢已開始拉票工作，包括親自向每位議員送上拉票信，又計劃去前稱「飯盒會」嘅泛民會議推銷吓，但財委會副主席人選就有多種聲音，有一批建制派希望由資深議員陳鑑林擔任，富貴黨則希望由泛民代表出任。
至於舊年被泛民突襲嘅工務同人事編制委員會主席位置，據聞建制派已有腹稿，前者屬意由工程界議員盧偉國出任，後者則由體文界議員馬逢國出任，到時睇吓會否一如所願嘞！
第一手消息請下載on.cc東網
