城中鏡：管理有方
點樣管理好一間公司，好考管理層嘅管治哲學，中港照相器材集團主席Dennis孫大倫早前出席活動時大談管理心得，笑言公司嘅事務基本上已交晒畀兩個仔處理，依家自己好少再管理公司，反着重管理自己。香港總商會主席YK彭耀佳則透露，曾遇到有同事要求延遲升職嘅個案。
彭耀佳指新一代員工追求工作生活平衡。
孫大倫笑言好耐冇管人，現專注管自己。
陳裕光（右）透露，蘇澤光當年喺學校係風頭躉之一。
香港管理專業協會早前舉行「最佳管理培訓及發展獎」頒獎禮及晚宴，多名嘉賓紛紛分享管理心得，其中Dennis話年紀大咗，發現照顧好自己身體健康先係最重要，近日佢就練緊類似氣功嘅呼吸運動。佢話早前花咗八日學習一套呼吸方式，只要坐喺度半小時就已經會成身出晒汗，現時佢早晚各練習一次，感覺肩頸酸痛嘅情況減輕咗。
ＹＫ曾遇女員工為男友唔升職
講番管理一間公司嘅經驗，YK話新一代員工追求工作生活平衡，有時亦會兼顧多方面問題，試過有一次，佢想將一位女同事升職，但嗰位女同事私下向佢請求唔升住，事關佢男朋友亦係公司一分子，但升職比佢慢，為咗顧及對方面子就提出咗呢個請求。YK思前想後，認為嗰位女同事工作能力的確較高，強行升佢職可能令佢哋感情有變而離開公司，反正延遲升職時間並無不可，答應咗該名女同事嘅要求。
同場仲有香港機場管理局主席蘇澤光同大家樂主席陳裕光，原來佢哋係喇沙師兄弟，陳裕光其後爆料，當年蘇澤光喺學校係風頭躉之一，唔單止係風紀隊長，仲喺台上為同學成功向校長爭取於畢業禮典後放一日假，成為同學間嘅偶像。
