政壇：佔中交數 戴耀廷一味拖
佔中發起人之一、港大法律學院副教授戴耀廷上月曾講過，會交代成個佔中行動嘅收支帳目，其核數程序已到尾聲，希望最快本月公開報告，但話雖如此，戴耀廷尋日出席活動被問及報告最新進度時疑「走數」，至少兩次話唔清楚，推說會計師需要時間整理同睇埋啲單據。
當問及係咪可以本月內「交數」，戴耀廷更三次話「講唔到」。話時話，佔中一周年依家都過埋，戴耀廷對公開收支帳目狀似十問九唔知，繼續「走數」拖得就拖，唔通以為側側膊就可以唔多覺，令佔中總捐款額等外界關心嘅答案，永遠都無答案？
講番今次戴耀廷公開現身，其實另外兩名佔中發起人陳健民同朱耀明亦有齊齊露面，其中朱耀明嘅左眼被發現用紗布包住，唔知係咪最近又做咗眼部手術？
