政壇：財金猛將 無懼「人評」App
食評網站見得多，「人評」見過未？有個可以評朋友、同事、甚至舊愛嘅App「Peeple」預計十一月面世，未開波已有創投資金落疊泵水，依家估值已差唔多六千萬港元。但創投睇好時，美國大學教授就話驚驚，擔心助長網上欺凌。
鄧聲興
李惠嫻
個App都未上架，呢幾日已經紅到爆，準確啲講，應該係黑到爆。事關網民發起簽名運動誓阻佢上架，四日內已有超過七千個簽名，連外國演員同名模都有份。咁個App實情點玩？你只要夠二十一歲，同有你想「評」嗰個Friend嘅電話號碼，就可以開File寫「人評」兼畀評級星星。個Friend無得阻止畀你評，亦無得刪走負評；過後，負評記錄就直到永遠。講多句，驚唔驚誹謗？你諗你。
本地財金人一向行得前，佢哋又點睇？君陽證券行政總裁Kenny鄧聲興就話暫時無興趣Download呢類人評App。不過，講到被人評，Kenny笑笑口話最怕股友彈自己推介嘅股票冧巴唔準。
大華繼顯策略師李惠嫻就話自己係Small Potato（小人物），唔覺會有人評自己，亦唔怕被人評。佢覺得呢類人評App喺香港會幾受歡迎，事關港人意見多多，又鍾意喺網上留言。個App若出，佢都會登記嚟八吓，但只齋睇，唔評人。
