興建電梯歎慢板 施政無能又一樁
電影《2046》取景場地之一嘅懷舊餐廳停止營業，貼出告示「未能與您走到二○四六，榮幸與您度過花樣年華」。如今香港人聽落，真係百般滋味在心頭，唔係因為懷舊，而係慨嘆呢個政府推出嘅大小工程，幾乎無一不延誤，無一不等到二○四六。
政府當年提出十八項電梯工程建議，至今僅兩項落實。
呢嗱，話說貪曾在任期間一味黐飲黐食，忽然轉死性扮關心民生，評審全港上坡斜路，作為計劃興建上坡地區自動扶梯連接系統和升降機系統之用。呢個建議本來唔錯，因為香港地少人多，好多樓宇依山而建，居民上下山路舉步維艱，興建扶手梯系統方便老弱婦孺上落，如果搞得成，算係貪曾難得嘅德政。
最弊係呢個貪曾，講就天下無敵，做就有心無力，計劃一直只聞樓梯響，卒之拖到二○一○年，當局至公布二十項建議，除咗當中兩項被剔出名單，剩下嘅十八項建議，你估五年來幾多項有聲氣吖？唔係講笑，得兩個咁大把咋！
有議員引述去年嘅立法會文件指出，呢兩個項目包括「慈雲山行人通道系統」、「月華街自動扶梯連接系統」被納入其他計劃落實，其餘十幾個項目去咗邊呢？港產官僚話「已完成初步技術可行性研究」，換句話講，即係連影都無囉。
有無搞錯，工程規劃、勘測和設計已經要花五年咁耐，再加上之後諮詢、刊憲及動工等等，咪至少要等多五年又五年?多得呢班廢官，小市民日日撐樓梯上山，行到身水身汗，除咗問句「人生仲有幾個五年」都唔知可以做乜。
話時話，政府唔係成日話要集中精力發展經濟改善民生咩？因乜解究連整條自動扶手電梯都唔湯唔水。有立法會議員曾向政府反映問題，但港產官僚就死撐因為上坡工程涉及多個部門，而且相當複雜，需時較久咁話。
喂，家陣興建部自動扶梯啫，又唔係製造穿梭機，有幾複雜呀？又唔係修築萬里長城，要幾多百年呀？其實講到尾，咪又係官僚無能兼卸膊咁簡單啫!
冇計喇，呢個無能政府做乜都係甩甩漏漏，香港人都慣晒喇。所以當年貪曾誇下海口之時，已經好多人批死會爛尾收場，其實又未至於咁悲觀嘅，計太一叮話齋，上坡地區電梯工程唔一定爛尾，頂多「隨時起到二○四六，浪費市民花樣年華」之嘛，叮!
