香港呢排唔知係咪撞邪，好似港鐵行李風波咁吖，本來小事一樁，點知搞到滿城風雨。尋日之嘛，兩名東鐵搭客懷疑有人行李超出限制，大吵大鬧，幾乎打交咁滯，最後仲驚動埋警方，點知職員度完發現並無超標，吹脹！

房署職員一直靠目測判斷公屋戶裝冷氣係咪違規，兒戲到爆。

呢個故事教訓大家，目測係靠唔住嘅，斷估冇辛苦，隨時出事。可惜吖，港產官僚出晒名係差不多先生，硬係有鋪目測癮，危樹係咁，危險招牌係咁，估唔到連公屋冷氣機係咪違規伸出窗外亦係咁，有乜法子唔七國咁亂吖。

係人都知，八十年代落成嘅公屋單位冇冷氣機位，住戶安裝冷氣唔可以超出「房屋界線」。即係咁，冷氣機跌落街分分鐘搞出人命，謹慎啲無可厚非，問題係房署巡查非常之咁兒戲，係咁意目測就當交咗功課，卒之咪搞到爭議不斷囉。好似有三十幾年歷史嘅麗閣邨咁吖，房署最近向二百多個住戶發警告信，指佢哋嘅冷氣機伸出窗外，要求盡快移除，否則收回單位。居民徬徨之下，向立法會議員求助，幾經追問，至知原來禁令唔係一刀切，外牆承托力足以支撐冷氣機架嘅大單位、簷篷上嘅單位，以及安裝喺露台地下等，都可以豁免。

咁都未算最荒謬，本報記者向房署查詢，對方居然話一直容許冷氣機伸出窗外不多於六十厘米，連公屋關注團體都自嘲見識少，對呢條「新例」聞所未聞，一般市民更加蒙在鼓裏，簡直匪夷所思。

唔係啩，房署二十幾年嚟一直搞錯規例，亂咁目測亂執法，對小市民好唔公平啫，佢哋多年來被迫將冷氣機移入露台，搞到廚房同廁所要「焗冷氣」，簡直靠害。查實八十年代落成嘅屋邨有成四十個咁多，涉及三十萬個單位，房署官僚懵到上心口，唔單止擾民，直頭累街坊。今次如果唔係議員及傳媒出面，房署肯定一直錯落去。

講真，房署官僚敷衍塞責，烏龍百出，呢啲只係冰山一角咋。再以鉛水風波為例，如果唔係當初房署驗收馬虎，就唔會有咁多屋邨中招，唔怪得申訴專員公署每年接獲市民投訴政府部門，房署幾乎次次都高踞榜首喇。

官僚大事做唔到，小事做唔好，連公屋冷氣問題都搞到一鑊泡，呢啲咪係港府無能嘅縮影咯。其他嘢就話唔可以靠目測啫，庸官劣吏，一睇就知唔得掂喇，叮！