古人話，上下不和，令乃不行。管治團隊最緊要齊心合力，目標一致，先至可以順利施政，有所作為，相反，如果同床異夢，勾心鬥角，幾難有運行。好似港府咁吖，班高官雞同鴨講，九唔搭八，唔怪得施政混亂，烏龍百出喇。
話說最近樓市有逆轉迹象，成交淡靜，財政司司長曾俊華叻唔切，聲稱需要時會調整政策，引起港府可能「減辣」嘅猜測。點知話口未完，特首梁振英就摑咗佢一巴，認為目前房屋問題仍然嚴重，大部分家庭負擔唔起樓價，「辣招」要持之以恒喎。一個暗示可能減辣，一個強調唔會減辣，兩位港府話事人南轅北轍，互相矛盾，你話市民應該信邊個呢？
即係咁，隨着房屋供應逐漸增加，加上美國隨時進入加息周期，經濟前景唔明朗，本港樓市確實存在隱憂，有市場人士甚至估計未來兩年樓價可能跌三成添，但呢啲只不過係預測啫，家陣十畫未有一撇，鬍鬚曾咁快出口術話可能減辣，會唔會急咗啲呢？係人都知，樓市同金融市場一樣，對官方消息特別敏感，一有風吹草動，隨時引發市場炒作甚至震盪，尤其係特首同財爺互扯貓尾，訊息混亂，更加令人無所適從。
見微知著，從呢件事就可以知道港府管治團隊幾咁混亂，毫無溝通不特止，而且經常自打嘴巴。例如鉛水風波，呢頭教育局局長吳克儉堅持唔會替學校驗水，嗰頭政務司司長林鄭月娥就宣布為全港幼稚園及資助中小學驗水；又例如早前南韓爆發新沙士疫情，呢頭食衞局局長高永文宣布發出「旅遊健康建議」，嗰頭林鄭月娥就宣布發出「紅色旅遊警示」。港府一時一樣，高官各有各講，政策五時花六時變，講得好聽啲係缺乏溝通，講得難聽啲根本係狗咬狗骨。
所以話，香港烏煙瘴氣，七國咁亂，唔係冇理由（o架）。港英年代，港督一言九鼎，冇可能發生呢啲笑話；回歸後，港府淪為跛腳鴨，施政固然處處受阻，管治團隊內部更係矛盾重重，甚至連行政會議成員亦經常唱反調，搞到保密制同集體負責制名存實亡。難為北大人仲話特首地位「超然於三權之上」，簡直係阿Ｑ精神，特首連財爺都管唔掂，搞到籠裏雞作反，試問點樣「超然」呢？超廢就有！
講到底，人必自侮而後人侮之，港府民望低落，施政寸步難行，都係自己造成嘅咋！
