政壇：港青想買樓可惜月月光

「人人期望可達到，我的快樂比天高」，歌仔都有得唱，不過，現實中要實現期望並唔易。最近有個針對八、九十後青年嘅調查，了解佢哋嘅夢想排名，結果港青嘅五大夢想同兩年前相若，依然係買樓、有更理想嘅工作、環遊世界、有更高學歷同搵多啲錢。不過，港青就比兩年前務實咗，事關將買樓排喺首位嘅受訪青年只佔兩成九，較兩年前少咗五個百分點；反而希望有更高學歷嘅受訪青年就多咗四個百分點，似乎多咗青年將提升自己視為夢想。

雖然係咁，港青都有個大毛病。同一項調查發現，受訪青年中，每六個年輕人就有一個係「月光族」，即係個個月搵嘅錢都使清光，一蚊都儲唔到，甚至入不敷支，兩年前月光族嘅比例係每七個青年先有一個，換言之，家吓惡化咗！點解變成咁﹖或者消費模式可以睇到多少玄機，事關七成幾受訪者都話唔想超支，但最後「通常會使凸」及「先使未來錢」嘅受訪青年又有兩成二，可見唔少青年即使有用錢計劃，但往往都有理財任性嘅一面。

咁點先可以變得有錢啲？港青嘅方法都比較傳統，如四成一人認為靠投資，其次係一成七人要靠儲蓄，靠努力工作或創業嘅就係一成六。