時下唔少團體鍾意帶港青北上交流，但被批評流於「旅行團化」。香港青年聯會主席范駿華（Andrew）尋日接受電台訪問時話，青聯舉辦交流團只係第一步，並非深度體驗，參加嘅學生可以透過活動識多啲人，但之後就要靠自己喎！
Andrew話，青聯舉辦好多講座，旨在為年輕人提供機會。若港青想對國情等議題有深化認識，需要長時間了解，青聯可做嘅只係搵多啲機會畀佢哋去，任何交流團好難喺幾日內就讓學生體會全面國情。
講到佔領行動一周年，唔知Andrew有冇覺得年輕人變得激進？Andrew話，青聯係做青年工作，唔係政治工作。佢哋所提供嘅工作及實習機會等，公開接受各大專院校報名，不會過問學生政治立場。講到「一帶一路」嘅機遇，Andrew竟然話唔係好熟悉「一帶一路」對年輕人會有乜嘢實體化得益，因為佢係會計師，由於家庭關係，唔方便喺內地做業務喎！
第一手消息請下載on.cc東網
