城中鏡：靚太創業 網上賣甜品
成功打造一門屬於自己嘅生意，係唔少人嘅夢想，已故全國政協副主席安子介外孫楊鼎立太太翁嘉敏（Liana）與已故「鋼鐵大王」龐鼎元孫兒龐家怡太太周以敏（Emmy）四年前已經攜手創業，做開建築師嘅Emmy更因而辭去高薪嘅建築師工作，做開銀行高層嘅Liana雖然冇辭工，但就要犧牲睡覺嘅時間。
翁嘉敏（左）同周以敏（右）四年前攜手創業。
佢哋識於大學時期，因為「食」而一拍即好，四年前開設網上訂造甜品服務Beyond Dessert，由蛋糕、cupcake、曲奇至近年十分流行的「Dessert Table」均一手包辦，佢哋行事低調，開業至今並冇大事宣揚，但就賺得唔少口碑，客路不斷，城中唔少名人更係佢哋嘅捧場客。Liana說：「我平時好鍾意啲精緻得意嘅嘢，又鍾意整甜品，而Emmy畫畫好靚，又鍾意整公仔，不過呢個想法，係因為我個女一歲時，想幫佢開個生日派對，於是自己落手落腳整咗一張枱嘅candy，枱上每樣嘢都可以食，鋪晒上枱，無論小朋友或大人見到好興奮、好開心。於是叫埋Emmy一齊做網上訂造甜品，當時香港都仲未流行Dessert Table，我哋係第一個做。」
