城中鏡：家好月圓慶中秋
今年中秋節適逢周日，唔少城中名人都安排節目過節。潮屬社團總會主席陳幼南中秋夜同家人於大坑觀賞舞火龍，感受節日氣氛，翌日「追月」再與太太張思敏及兒子陳誠傑入馬場湊熱鬧。理文造紙創辦人李運強則與家人齊齊上天台賞月，睇住啲孫仔開心玩燈籠，一家團圓最幸福不過。
陳幼南夫婦（左一及二）及兒子陳誠傑入馬場湊熱鬧。
貝鈞奇（左一）中秋唔睇月亮去睇波。
楊孫西（後左三）、施子清（後左四）及盧文端（後右二）三家人齊過中秋。（受訪者提供）
陳幼南話，佢同家人睇大坑舞火龍起步已經有幾年，知道一定會又熱又多人，所以一早帶定條毛巾準備抹汗。好在佢哋住喺附近，唔使刻意於大坑食肆訂枱食晚餐，一家人喺屋企食完飯先慢慢行落去就有得睇嘞！
子孫滿堂嘅李運強就話，中秋節叫埋啲孫及親家聚首一堂，連農曆新年都未必咁齊人。過中秋免不了食月餅，依家啲月餅口味五花八門，李運強最鍾意嘅都係傳統白蓮蓉月餅，仲話至今仍未試過冰皮月餅喎！
貝鈞奇：睇波多過睇月亮
香港足總副主席貝鈞奇就對圓碌碌嘅足球比較有興趣，中秋夜同家人一齊睇波多過睇月亮。講起國際足協調查緊早前香港球迷於世界盃外圍賽香港主場對卡塔爾時，賽前被指「噓國歌」一事，貝鈞奇就話未有咁快知道調查結果，估計需時約兩個月左右，到時佢會視乎懲罰而提出上訴。
至於福建幫頭領楊孫西、施子清及盧文端三位結拜兄弟，一向都一齊過節，今個中秋亦唔例外，三家人共約四十人一齊喺深灣一個會所訂枱食飯，場面好熱鬧。
