政壇：搞搞政：高鐵超支狂抽水 田二少立場穿崩
高鐵香港段嘅造價一再超支至八百五十三億元，落成日期延至一八年第三季，立法會交通事務委員會主席田北辰（田二少）早前就此不停爆料，話當年政府壓價狂斬預算先至埋下今日超支禍害，又話不如政府補鑊畀夠數，其餘超支先至由港鐵承擔云云，成個知情人士咁。不過，政府消息就話佢根本係站在港鐵立場講嘢，而且內容不盡不實，一句講晒，就係踢爆田二少喺高鐵一事上顯露嘅絕唔係真功夫囉。
消息人士話，立法會二○一○年通過高鐵撥款，預留六百億元畀高鐵工程合約。至今高鐵項目嘅鐵路隧道、西九龍總站及機電工程三大範疇，只係批出四百五十多億元合約，證明政府當時預測都幾準確，依家仲有現金剩。至於田二少建議，不以一八年第三季通車為目標，咁就可以降低開支，因為唔使搶貴工程費喎！政府中人就質疑，工作就係咁多，唔會因為延期通車而少咗，只係唔使搶高工人工資，但延長嘅話，到時管理費一樣會多咗，一加一減都未必有着數。
強調代市民發聲
消息指，由於港鐵係獲政府委託處理高鐵，條款冇可能列出港鐵要負無限責任，所以跟合約，只係唔收管理費，點處理都好頭痕，相信最後或需經仲裁解決，唔需要打官司。我哋問過二少，佢就反駁話，政府只預四百五十億元加五十億元應急費畀港鐵工程，依家即將使晒。佢又質疑政府冇勘探好地底數據，又改天幕設計，先搞到好多索償。佢強調自己係代表市民發聲，希望港鐵同政府放下意氣之爭，傾好點處理超支一事。
