政壇：袋巾傑有鋪拍枱癮

湯家驊退黨 搞到一頭煙

有知情人士爆料，袋巾傑為人所知仲有兩次拍枱事件，其中一次係同特首梁振英共進早餐時，袋巾傑就某議題爭拗拍枱，令早餐會最終草草收場；另一次係同基本法委員會委員饒戈平會面時，袋巾傑當時就有評論批評泛民為「賤骨頭」大興問罪之師而拍枱。袋巾傑唔止一次喺泛民同內地及港府要員會面嘅場合拍枱，或者係畀人一種佢立場堅定嘅感覺，但亦有一種意見認為佢扮大佬，理性、溝通真係得個講字咋。

講開公文袋，湯家驊退黨兼辭去立法會議員職務，已經搞到公文袋一頭煙，事關依家公文袋六人辦事處位於立法會八樓，湯嘅辦事處夾喺毛孟靜（正盲毛）同黨魁梁家傑（袋巾傑）中間，湯出走令公文袋中人未能連成一線，除非正盲毛搬位移近袋巾傑，否則立法會秘書處或會以圍板封番空出嘅辦事處。

據知，公文袋中人對解決此問題意見不一，有人主張避免出現溝通問題，正盲毛應搬位填補番呢個「空缺」，然而有人認為搬出搬入好麻煩，想不變應萬變，另有意見更指，既然平時意見都南轅北轍，不如趁機可以邊緣化正盲毛。