幾年前有首《小明搭港鐵》熱爆網，「小明搭港鐵，確寫意，在清早，見到你多麼好，樂陶陶地上學，在城內上班，齊齊伴小明，快樂搭港鐵」琅琅上口。依家聽番，小明之所以搭港鐵搭得咁寫意，相信佢一定無學古箏嘞！

網民上載圖片，指有乘客攜帶床褥乘港鐵，不滿港鐵選擇性執法。

呢嗱，日前一名穿着校服嘅女學生，因為攜帶嘅古箏超出行李長度限制，畀港鐵職員截查，仲唔畀佢上車添。事件引發網民激烈討論，鬧爆港鐵「蝦細路女」。

講句公道話，港鐵唔止蝦女學生，連香港前亞運桌球金牌選手陳國明都照蝦（口架）。話說呢位冠軍人馬因為帶支球棍盒搭港鐵，即被港鐵職員警告。陳國明慨嘆呢個「禁Cue令」一日唔撤，去深圳作賽隨時要坐飛機，你話係咪好荒謬呢。

最令人唔服氣嘅係，古箏及桌球棍被指超出行李長度限制，因乜解究成日有水貨客用港鐵運貨，又被選擇性放生咁得意嘅呢?

口講無憑，有網民喺討論區貼圖，港鐵車廂似足貨倉，龐然巨物五花八門，關刀、層架未算誇張，連巨型床褥、疊起高過成年人嘅貨物甚至洗衣機都有，如果恐龍未絕種，好可能喺港鐵車廂出現。

鬼咩，原來港鐵附例無訂明行李嘅大小及重量，港鐵可按需要及實際情況，自行根據附例執法懲處乘客，完全唔受政府及立法會監管。難怪有議員鬧爆港鐵好似手執「尚方寶劍」，直頭係「無王管」！

弊在呢把「尚方寶劍」成日亂咁斬，執法標準一時一樣，好似話港鐵為打擊水貨客，要求行李磅重，點知經常「好人當賊辦」，連嬰兒車都唔放過，一樣要過磅，嗱，呢啲咪叫「矯枉過正」囉，咁搞法，話唔定遲啲肥人高佬都唔畀搭港鐵呀。

不過講到最無辜嘅，應該係港鐵前線員工。由於附例唔清唔楚，既要「一眼關七」，又唔會做到「大細超」，要公正執法，簡直難過登天。與其要職員左右為難，點解唔「白紙黑字」訂立正式機制，豁免有特殊需要乘客嘅行李限制，例如話學生或其他乘客有特殊需要可以獲豁免，咁咪可以避免好多不必要嘅衝突囉。

計太一叮話齋，今日香港已經夠亂，連搭港鐵都畀擾民廢法搞到一頭煙，唔怪得香港人唔快樂喇。希望港鐵快快趣趣搞掂佢，唔好再添煩添亂，等大家可以「齊齊伴小明，快樂搭港鐵」！叮！