搭飛機出外旅遊，本來係一件賞心樂事，不過咁，近年飛機意外頻生，作為精明嘅乘客，應該揀間可靠嘅航空公司，以免樂極生悲。例如「有口皆悲」嘅國泰航空公司咁吖，最好可免則免囉。

唔係靠嚇o架，國泰近年大小事故源源不絕，烏龍百出，真係令人防不勝防。呢，話口未完又嚟嘞。

話說日前有班由澳洲珀斯來港嘅國泰航機，飛飛吓懷疑引擎着火，被迫緊急降落印尼峇里，總算係有驚無險，不幸中之大幸喇!

有乘客事後講番仲係驚魂未定，話當時聽到一聲巨響，之後飛機不停震動，機艙突然漆黑一片，最恐怖嘅係，望出窗外竟然見到機翼及引擎冒火，仲有火花噴出，有啲乘客直情嚇到喊。

最離譜嘅係，國泰善後安排又係七國咁亂，飛機急降後，乘客被迫喺機上呆等兩粒鐘不特止，國泰仲死撐話機艙同引擎無起火，係引擎出現故障，仲話乘客見到嘅唔係火燄喎。叮，除非係咁多乘客眼花啫，唔通有人喺飛機翼玩螢光棒慶中秋咩！

國泰衰咗，當然想大事化小，不如聽聽專家點講啦。前民航處處長樂鞏南估計事故可能涉及渦輪片「斷咗」，斷片射穿引擎外殼產生火花或火燄，懷疑渦輪片質素表現未達要求。亦有航空專家指出，飛機引擎喺高空着火，可能涉及機件故障或燃油喉管漏油，形容係一宗「唔正常」嘅航空事故。嗱，面對呢啲「唔正常」嘅事故，乘客唔驚就假。

話時話，國泰一向問題多多，大家早就見怪不怪咯。今年七月之嘛，有班由本港飛往洛杉磯嘅國泰航機，由於機艙內探測到煙霧，要緊急降落美國阿拉斯加軍用機場。雖然最後安全無事，但好多乘客已經嚇到面青口唇白，食幾多驚風散都補唔番啦。

冇計喇，國泰管理不善，搞到醜聞不絕，勞資糾紛無日無之，員工士氣低落，服務不斷插水，全球排名急跌，想唔出事都幾難。一間咁知名嘅航空公司淪落到咁嘅地步，都唔知可笑定可悲。

計太一叮話齋，今次呢單九霄驚魂有驚無險，係乘客福大命大，如果國泰再唔正視問題，改善服務質素，下次仲有冇咁好彩，冇人敢寫包單o架。總而言之，大家出外旅遊時最緊要自求多福，謹記「生命誠可貴，飛機咪亂搭」呀，叮！