巡查制度如虛設 醫牙隨時染愛滋

呢嗱，澳洲悉尼早前揭發至少有十二名牙醫，懷疑過去幾年冇妥善清潔及消毒工具，埋下傳播愛滋病或甲型肝炎等傳染病嘅風險，過萬名曾接受過診治嘅病人擔心受到感染，終日提心吊膽，有得震冇得瞓，認真無辜。

唔講唔知，澳洲牙醫嘅水平居然拍得住以前香港城寨嘅無牌牙醫，真係令人難以置信。咁家陣嘅香港又點呢？牙醫水平又如何呢?

根據本港《牙醫註冊條例》，牙醫管理委員會可授權任何公職人員，定期及突擊視察註冊牙醫執業處所，可惜吖，法例還法例，事實又係另一回事。正如有牙醫話齋，咁多年從來未試過被巡查，亦無聽過其他同業被查過，咁即係點?即係無王管囉。

鬼咩，你估牙醫管理委員會授權幾多人定期巡查呢?答案係一個，而本港註冊牙醫就有二千三百個，咁簡單嘅數學，小學雞都識計喇，除非呢位巡查員有三頭六臂兼識得分身術，否則即使全年無休，要巡晒二千三百個牙醫，至少要花三年，難怪有牙醫質疑巡查制度只係做吓樣嘅啫。

今時今日，連三歲小朋友都知道唔好共用手巾仔，以免交叉感染，反而牙醫好似無王管咁，問你怕未。試諗吓，如果牙科器具上面有愛滋病毒，用完後又無徹底消毒，你話會有咩後果呢？

巡查形同虛設都算嘞，最弊係香港冇強制規定要求病人提交病歷，亦冇強制要求醫護人員進行愛滋病毒測試，主要靠受感染者自願呈報，對醫護及病人都毫無保障。呢，自九四年至今，共有四十三名醫護人員呈報感染愛滋病，包括醫生、護士、牙醫等，呢個數字可能只係冰山一角，實際染病嘅醫護人員究竟有幾多，睇怕只有天知同地知。

話時話，本港暫時冇病人因接受診治而受到感染，只不過係好彩嘅咋。美國佛羅里達州有位牙醫，一九八七年染上愛滋病，之後再將病毒傳染畀接受佢診治嘅六名病人，都咪話唔得人驚。計太一叮話齋，前車之覆，後車之鑑，如果港府再唔諗辦法嚴加規管，堵塞漏洞，遲早爆大鑊嘅咋，叮！