古語有云：天下本無事，庸人自擾之。講得一啲都冇錯，今時今日嘅香港七國咁亂，咪就係因為太多庸人無風起浪，搞到社會紛擾不絕，無日安寧囉。

好似港鐵拒絕「古箏女生」入閘事件咁吖，本來唔係咩大事，只要好好解釋，交代清楚，好快就可以平息，勢估唔到事件不斷發酵，吵吵鬧鬧半個月，至今餘波未了，你話奇唔奇吖。

尋日之嘛，有人又喺社交網站發起到港鐵大圍站踩場，結果有班人帶同大型樂器到場「演奏」，惹來幾百人聚集圍觀，仲有人指罵港鐵職員添，搞到嘈喧巴閉。正所謂，樹欲靜而風不止，呢件事一日未擺平，爭拗仲會陸續有來。

講到底，所有亂象都係港鐵自己造成，明知事件引發爭議，火紅火綠，本來只要靈活變通，豁免有特殊需要乘客嘅行李限制，就可以避免好多不必要嘅爭拗同衝突。弊在港鐵似乎當民意冇到，雖然承諾會檢討行李體積規定，但點都唔肯暫時放寬畀巿民帶大型樂器入閘，根本就係火上加油，亂上添亂。

冇錯，維持站內秩序及車廂安全係應有之義，亦係港鐵嘅責任，問題係前線執法準則一時一樣，市民無所適從，確係好難令人信服咯。市民帶古箏樂器被指超出行李長度限制都算嘞，最離譜嘅係，家長帶BB車搭港鐵都要過磅，甚至連亞運桌球金牌選手陳國明帶球棍入閘，都被港鐵職員警告，呢啲咪叫矯枉過正囉。沒有最荒謬，只有更荒謬，再係咁落去，睇怕遲早高過六呎嘅人都唔畀入閘添呀！

所以話，港鐵好做唔做，一味添煩添亂，反而面對水貨客嘅時候就變得有心無力。呢，有網民經常喺討論區貼圖，車廂內除關刀、層架外，有時連巨型床褥以及洗衣機都有，車廂變成貨倉，港鐵隻眼開隻眼閉，好多時選擇性放生。咁樣執法究竟係大細超，定係欺善怕惡，公道自在人心。難怪有網民指港鐵「只許水貨客入閘，不許古箏女搭車」，唔係冇理由（口架）。

正如古人話齋，家和萬事興，家衰口不停。香港已經夠晒亂啦，佔中及反水貨客行動搞到市民雞毛鴨血，家陣連搭港鐵都要嘈一餐，有冇再無聊啲呀。港府都識講喇，「民生無小事」，唔該港鐵快快趣趣擺平佢，咪再為社會添煩添亂啦，叮！