「從那天起我不辨別前後，從那天起我竟調亂左右。」歌就係咁唱嘞，現實又點呢？一樣嘅咋，前後左右不分嘅笑話屢見不鮮。

呢嗱，唔少機構喺十月一日懸掛國旗同區旗，原來諗住應吓節，贈吓興，點知烏龍百出，笑話多多。上環一間中資機構將區旗上下掉轉，紫荊花瓣由原來順時針方向變逆時針方向；而沙田一間小學就將五星旗倒掛，你話係咪好笑吖。

話時話，呢啲蝦碌場面幾乎無日無之，連政府部門都唔例外，消防處救護站、警署、勞審處……你錯佢又錯，你烏龍佢又烏龍。有人話九七後嘅香港換湯不換藥，除咗龍獅旗改成洋紫荊旗，總督改成特首，其餘一切原封不動，回歸只係得個樣。其實，就算換咗旗幟又點吖，港府無心無肺，掛旗掛到亂晒龍，咪一樣嘥氣。

正所謂，嘢唔可以亂食，國旗及區旗更加唔可以亂掛。內地《國旗法》禁止民眾「焚燒、毀損、塗畫、玷污、踐踏」國旗；而美國更加明文規定，除非喺極度危急嘅情況下向外界求援，否則不得倒懸國旗。好似最近熱播嘅一套美劇咁吖，片頭顯示一幅掉轉嘅美國國旗，就係寓意國家是非不分，處於危難狀況嘞。

講起真係諷刺，香港已經回歸十八年，好多人到今日仍然唔知點樣掛國旗及區旗，導致烏龍百出，除咗證明港府冇心冇肺，亦反映國民教育失敗。所以話，香港名義上回歸咗，實際同以前根本冇分別。最匪夷所思嘅係，回歸後港督府本應改名「特首府」，結果居然變成「禮賓府」，英國人反客為主，中國人就反主為客，你話係咪本末倒置吖？仲有吖，原來本港法例仲遺留好多殖民地色彩，例如《刑事罪行條例》仲有「襲擊女皇」同「反英皇罪行」等條目；而《官方機密條例》就充斥「女皇陛下」以及「聯合王國」等殖民地色彩字眼，簡直不可思議。

正所謂，上有好者，下必甚焉。大家應該記得，舊年佔領期間，有位女高級警司會見傳媒時居然頭戴回歸前皇冠警徽嘅警帽，被識穿之後仲理直氣壯話留為紀念，擺明對舊主人念念不忘。北大人批評香港回歸後冇致力去殖民化，任由應該放喺博物館嘅嘢招搖過市，唔係冇道理（口架）。

名不正則言不順，言不順則事不成。香港連掛旗咁簡單嘅事都一塌糊塗，港府管治又點可能唔混亂吖，叮！