劏房租金係咁升 基層市民最可悲

事隔幾十年，香港自誇係國際大都會，之但係講到房屋問題，唔止無改善過，反而更加惡化添。呢，一個豆腐膶咁細嘅單位，隨時劏出十幾間房，租金仲「跑贏大市」，以呎租計甚至貴過唔少豪宅，升斗市民任人宰割，除咗一殼眼淚，仲可以點呢？

呢嗱，有團體訪問咗四百幾個葵涌劏房住戶，發現劏房、板間房及天台屋租金增長幅度，係住戶平均入息增幅嘅五倍，即係話，劏房戶無論點樣死捱爛捱，人工加極都追唔上租金增幅。至於住戶平均每月租金開支仲得人驚，佔咗入息三成幾，加上水電等開支幾乎佔四成咁滯，節衣縮食都唔夠畀租，難怪劏房住戶「愈住愈窮」、「愈住愈差」喇。

可能有啲「何不食肉糜」嘅達官貴人會問，既然劏房又細又貴，「何不住公屋」?老老實實，有頭髮邊個想做瘌痢吖。房委會數字顯示，截至今年六月底，輪候公屋宗數已經超過二十八萬，創出歷史新高，可能好快就突破三十萬大關添，所謂嘅三年上樓承諾得個講字，睇怕有人等到地老天荒都未必等到。

好嘞，公屋輪唔到，私樓又貴到離晒大譜，基層家庭但求有瓦遮頭，唔住劏房仲有咩選擇呢？其實，有劏房住都算唔錯嘅喇，家陣連雞欄、豬欄改建成嘅居所都大把人爭，都咪話唔悲哀。

面對房屋問題愈演愈烈，有關注團體幫政府度橋，建議重新訂立租務管制，並且改建空置工廈或政府建築物，希望為基層市民提供過渡性房屋。

計太一叮話齋，呢啲措施唔係話無效，不過最多只可以暫時止吓咳，長遠嚟講，最重要盡快增加公營房屋供應，至可以治標又治本。話時話，香港唔係無地起屋，港府亦唔係唔想起，最弊係有啲人郁吓就提出司法覆核阻頭阻勢，搞到港府寸步難行，有地都用唔到，房屋供應減少咯喎，樓價同租金係咁飆升，最後咪又係基層市民受害。

講到尾，房屋供求失衡，一日都係前朝貪曾政府留低嘅禍根，現屆政府再唔盡快諗辦法解決，問題不斷惡化，劏房戶愈來愈多，一旦幾十萬家房客嘅怒火燒起上嚟，到時再諗辦法就遲o架喇，叮！