香港經常將新加坡當假想敵，乜都要同人比，但就乜都輸畀人，諗落都幾無癮。呢嗱，話口未完又嚟嘞！

呢，美國民意調查機構蓋洛普尋日發表全球法律與秩序指數報告，了解全球一百四十一個國家及地區嘅安全狀況，結果新加坡榮登榜首，而香港就輸半個身位，僅得第三名。

表面睇嚟，香港躋身全球安全城市三甲，比上不足比下有餘，都叫做有交代，但實際係咪咁，就好令人懷疑嘞。尋日凌晨之嘛，兩名德國遊客喺尖沙咀酒吧消遣完返酒店，行經重慶大廈對出，畀幾名南亞裔賊人攔途截劫，破財兼傷身不特止，連回程機票同護照都唔見埋。咁都未算誇張，一位台灣商人報稱成袋黃金喺寓所不翼而飛，中秋節淪中秋劫。今次調查其中兩條問題，正正係「晚間獨行是否感到安全」以及「你和家人過去十二個月內曾否被竊財物」，家陣連爆兩鑊，都唔知攞景定贈興。

講番德國遊客遇劫呢單嘢，事發嘅重慶大廈龍蛇混雜，黃賭毒樣樣齊，早就「威名遠播」，而南亞裔人士亦經常成為新聞主角。好似早排港鐵佐敦站發生集體械鬥事件，十幾人光天化日下劈友，劈到血肉橫飛，簡直駭人聽聞，其中就有酷刑聲請嘅南亞及非裔人士嘞。講真，呢啲人來港打黑工都係其次，其中不少係姦淫擄掠、無惡不作嘅亡命之徒，畀佢哋咁樣搞一搞，香港有乜法子唔危機四伏吖。

最慘係遊客即使咁好彩冇畀人劏死牛，亦冇遇着街頭開大片，都唔代表萬事大吉。你知啦，激進組織唯恐天下不亂，唔係「驅蝗」就係「光復」，所有疑似內地旅客都唔放過，見人鬧人，見篋踢篋，就連非內地旅客都誤中副車，係人都怕怕喇！

古人教落，危邦不入，亂邦不居，遊客最多對香港敬而遠之，本地人就唔同喇，除非移民嘅啫，否則惟有焗住硬食，都咪話唔無奈。大家有眼見，香港地都市陷阱無處不在，出街唔係天降招牌就係天降巨樹，以為在家千日好咩，飲啖水又驚中鉛毒，再加上空氣質素超差，食品安全堪憂，衣食住行瓣瓣都要提心吊膽，莫講話唔安全，直頭不宜居。

講到呢度，太一叮不期然諗起兩句唐詩︰「白頭宮女在，閒坐說玄宗」，香港已經由福地變危地、亂地，所謂全球最安全城市，當掌故咁同子孫講就差唔多，叮！