迪士尼樂園有首名曲叫《世界真細小》，一句「人人常歡笑，不會眼淚掉」唱到街知巷聞。不過咁，今時唔同往日，迪士尼好難再靠一支歌走天涯咯，家陣一曲《香港主題樂園真細小》，似乎更貼切，更深入民心!

呢嗱，上海迪士尼樂園出年春天就開幕，首期面積達到三百九十公頃，足足係香港迪士尼園區嘅三倍，夠大嘞啩?咁都未算吖，北京亦拍板引入環球影城，最快二○一九年開園，總用地達四百公頃，相當於四個幾香港海洋公園，而且係全球最大添，擺到明Show Hand（大）香港啦!

北京環球影城唔止大，班底仲巴閉，重金禮聘荷里活著名大導史提芬．史匹堡參與設計，總投資額超過六百億港元，大件夾抵食，淨係牌面已經贏晒啦。加上北京環球影城對內地居民有地理優勢，人比人比死人，園比園比死園，香港迪士尼相形見絀，簡直係蚊髀同牛髀，你話日後仲點樣吸引內地客呢？

可能知道有危機啩，日前香港迪士尼樂園慶祝十周年，「煙火滿樂園」，唯獨行政總裁金民豪「斯人獨憔悴」，預警將面對其他地區嘅競爭咁話喎。冇辦法，香港迪士尼面對嘅困境，可以講係本地旅遊業嘅縮影，想樂觀都幾難。

睇睇過去十年，馬來西亞有樂高樂園，新加坡有環球影城，兩年後仲會推出全球最大生態主題樂園添。反觀港產官僚除咗食老本，乜都唔識做，旅遊設施十年如一日，景點數嚟數去只得迪士尼樂園及海洋公園，莫講話旅客玩到厭，香港人都聽到厭啦!

更弊嘅係，旅遊硬件唔掂，連軟件都衰過人。近年激進組織自毀「好客之都」金漆招牌，一時「驅蝗」，一時「光復」，旅遊購物區淪為趕客戰場，仲恐怖過伊拉克同敍利亞咁滯，難怪內地旅客避之則吉，請都唔嚟啦。

講到尾，要怪只怪無能港府不思進取，危機殺到埋身仍然一味等運到。好嘞，即使依家如夢初醒，忽然重彈舊調要發展大嶼山，雖然話「遲到好過無到」，但家陣優勢盡失，想追都唔易喇。何況港產官僚講就天下無敵，做就有心無力，加上政客阻頭阻勢，呢張期票唔知何年何月至兌現!

計太一叮話齋，香港人坐困愁城，除咗唱番句「人人難歡笑，日日眼淚掉」，又可以做乜呢，叮!