零售業步入寒冬 反水客傷口灑鹽

呢套卡通片本來係教導市民遇到困（車立）時，只要保持冷靜，就可以逢凶化吉。不過咁，太一叮認為呢套宣傳片有更多深層意義，係暗示港產官僚唔理香港幾咁水深火熱，佢哋一樣「乜都唔使做」。

呢嗱，七月零售業又唔掂，已經係連續七個月下跌，業界拍晒烏蠅嗌救命，話情況仲慘烈過沙士及金融海嘯時期。唔信，睇吓連財雄勢大嘅中環名店都頂唔住要提早退租，就知形勢幾咁惡劣。本報記者去銅鑼灣利園山道睇過，更加係重災區，幾乎十室九空，人影都唔多隻，遲啲哈囉喂開P嚇鬼都得呀！

冇錯，零售業生意慘淡有好多因素，包括內地經濟下滑、匯率改變等等，但最關鍵嘅肯定係激進組織大搞「光復行動」，對內地客喊打喊殺，畀着係你都避之則吉啦！

香港搞成咁，最應該叮爆嘅係港產官僚，一味坐享其成，無所作為，而且阿茂整餅推出「限奶令」，唔止損害香港自由經濟聲譽，最大劑係令到內地民眾反感，連內地官方媒體都睇唔過眼，批評香港「懶惰」，「吃老本」。

仲有呀，港產官僚最叻係等運到同埋卸膊，一味將包袱推晒畀中央，嗰頭嫌客多攪亂香港，將「一簽多行」改成「一周一行」，呢頭又嫌客少食唔飽，要求中央增加個人遊城市，有事鍾無艷，冇事夏迎春，你話係咪神經錯亂吖。

老實講，即使中央皇恩浩蕩再增加個人遊城市，咁又點吖，最後咪又畀激進組織嚇走晒。嗱，話口未完，今日激進組織又搞「光復上水」遊行，當局例牌批出不反對通知書，隨時又有暴力場面都似！

睇吓澳門吖，雖然同樣面對旅遊業不景，七月旅客數字按年減少近百分之四，但澳門政府無攤大手板要阿爺打救，一手緊縮財政開支，另一手主動出擊推出推廣旅遊活動，希望短期內追回跌咗嘅旅客數字，呢啲咪叫做「強政勵治」囉，港府學吓嘢喇！

講起真係可悲，上水等光復區嘅生意被打殘，比年初足足少咗一半，零售業界只好唱潮州音樂「自己顧自己」，情況繼續差落去，除咗裁員之外，仲有咩選擇吖。香港人好似困（車立）咁，到時想做都無得做，坐定定等死都得嘞，叮！