周一嶽專攪亂檔 平機會爛到入心

話說呢位周一嶽當年做食物及衞生局局長，一把手掌管全港醫療衞生及食物安全政策，衰在能力不足，管理唔掂，搞到公立醫院七國咁亂，前線醫護大逃亡，醫療事故多過乜，此為一害。

咁都未算，佢在任期間，一直對食物安全問題闊佬懶理、冇監冇管，搞到各類有毒食品長驅直入，幾乎落地生根咁滯，禍延至今，此為二害。

至於第三害，唔使問阿貴，梗係指以周一嶽咁劣迹斑斑，都可以「翻閹」做平機會主席啦，真係一百歲唔死都有新聞呀！鬼咩，本屆政府有眼無珠，好揀唔揀，偏偏揀咗周一嶽呢條廢柴，簡直唔衰攞來衰。好嘞，周一嶽任期即將屆滿，港府公開招聘繼任人喎，咁即係變相送瘟神喇。

眾所周知，周一嶽出晒名叫「周一鑊」，又名「廢鑊」，唔孭鑊好似唔自在咁，去到邊衰到邊。去到平機會又點呢？嗱，市民嘅眼睛係最雪亮嘅，正如「東方報業民意調查」結果顯示，大部分受訪者批評周一嶽任內毫無表現，鬧爆佢能力不足，添煩添亂。

冇辦法，有周一嶽嘅地方，點可能唔衰完一鑊又一鑊吖。舉個例，「廢鑊」終日無所事事，唔係開高薪厚職明益自己友，就係豪花公帑擴充辦公室，仲要政府增撥六百多萬資助，唔怪得大多數受訪者狠批佢大花筒，無王管。

好嘞，大花筒都算啦，至弊周一嶽胡混度日，冇醒醒定定做好份工。上樑不正下樑歪，平機會處理市民投訴懶懶閒，每年終止調查數字高企，激起民怨。受訪者普遍都認為佢哋成事不足、幫唔到手，一大筆公帑花得冤哉枉也。

不過咁，周一嶽又唔係話完全冇做嘢嘅，佢只係有正經嘢唔做，無風起浪攪亂檔就做到十足十。例如佢提出為性傾向歧視立法諮詢，引起社會極大爭議，簡直係阿茂整餅，冇嗰樣整嗰樣。有三成八受訪者批評佢渾渾噩噩，為社會添煩添亂，真係多得佢唔少呀！

所以話，多隻香爐多隻鬼，平機會前後總共有七任主席，個個都係醜聞纏身，唔係用人唯親，就係大花筒，港府連周一鑊呢舊廢舊電池都當係寶，又點可能唔施政混亂、烏龍百出吖！叮!