《莊子》有個寓言係咁講嘅，有棵樹主幹生咗好多瘤狀物體，彎彎曲曲，被視為「無用之木」，連木匠都唔吼，結果因禍得福，一直平平安安生長落去，得享天年。

好明顯，古人無非想透過呢個故事表達「無用之用」嘅智慧，不過咁，呢棵樹喺古代可以得享天年啫，如果生長喺今日嘅香港，就冇咁好彩喇，事關當局護樹毫無準則，有時關人個關，有時就矯枉過正，「無用之木」隨時畀人斬咗都唔知乜事吖。

呢嗱，港島醫院道有棵石牆樹懷疑經常畀車撞，搞到根部損傷腐爛，畀真菌入侵兼有惡化徵狀，路政署以緊急為由，尋日想繞過樹木專家擅自修剪，直至港大教授詹志勇表示關注，署方至唔敢輕舉妄動咋。正如關注團體質疑，樹木辦已安排專家小組月底為呢棵樹檢查，路政署亦知道相關安排，點解仲要繞過樹木專家先斬後奏呢？

所以話，港產官僚護樹毫無章法可言，本身固然烏龍百出，連私人屋苑都有樣學樣。馬鞍山幾十棵樹去年啱啱遭「去頂」，今年枝、葉又被斬，搞到有廿幾年樹齡嘅台灣相思樹得番光禿禿嘅樹幹，隨時被蟲害入侵而倒塌都似。

即係咁，小心駛得萬年船，樹木有危險當然要及時處理，否則萬一又搞出人命，咁就大件事嘅喇。問題係，當局進退失據，唔少健康樹木亦逃唔過魔爪，係又斬，唔係又斬，實在令人莫名其妙。當局護樹究竟有乜準則呢？樹木辦資料顯示，去年十月至今年四月底，當局喺全港各區進行一萬七千八百多項風險緩解措施，包括修剪樹木、移除危險樹木等。表面上好似做咗好多嘢，實情係當局驗樹求求其其，經常淨係靠肉眼觀察，你話靠唔靠得住吖？

本來呢，港府耗費咁多公帑成立樹木辦，就係負責統籌各部門嘅樹木管理工作，結果形同虛設，政府部門一樣係各自為政，卸得就卸，搞到塌樹危機唔止冇改善，反而不斷惡化，簡直係多隻香爐多隻鬼。呢，舊年又有孕婦被塌樹擊中，釀成一屍兩命慘劇，連申訴專員公署都睇唔過眼，炮轟官僚護樹不力。

計太一叮話齋，樹木辦得物無所用，斬樹驚畀人鬧，唔斬又隨時冧樹傷人，一味守株待兔等運到，咁不如索性自行了斷，唔使再篤眼篤鼻，慳番公帑好過喇，叮！