香港依家話就話失業率低，幾乎全民就業咁滯，可惜只係假象咋，唔少打工仔日捱夜捱，入不敷支，莫講話唔可以好似「中產」財爺曾俊華咁飲紅酒、睇法國電影，連應付基本生活都有問題吖。

在職貧窮問題不斷惡化，成為社會深層次問題。

嗱，根據樂施會嘅「香港在職貧窮報告」，貧窮家庭由一○年嘅十七萬戶增至一四年嘅十九萬戶，五年間增幅超過一成，在職貧窮人口高達六十四萬。報告又發現，十九萬在職貧窮住戶中，五成三月入低過相應人數住戶嘅平均綜援金額，即係話，就算有工做，收入仲少過攞綜援，簡直係打工仔悲歌。

以前有工做等於生活有保障，雖然付出半斤力未必攞得番八両，但最低限度有兩餐溫飽。可惜家陣冇呢支歌仔唱咯，香港貧富懸殊不斷惡化，冇工做固然生活淒涼，有工做一樣捉襟見肘，安居樂業變成遙不可及嘅奢望。所以話，好多基層家庭攞綜援都係迫於無奈嘅咋，日捱夜捱都難以餬口，唔攞綜援仲有乜辦法呢？

講起真係可悲，香港自詡國際都會，港府肥到連襪都着唔到，但好多基層市民居然連自力更生都唔容易。在職貧窮之所以愈嚟愈嚴重，原因係多方面嘅，人工跟唔上通脹係其中一個。樂施會踢爆，多年來最低工資累積升幅只有一成六，而同期通脹就高達兩成，即係人工不加反減，真係好似許冠傑話齋「慘過滾水淥豬腸」，唔窮至奇吖。

不過咁，本港窮人愈來愈多，歸根究柢都係因為經濟結構單一，獨沽金融及地產，低學歷及低技能嘅基層打工仔選擇有限，毫無叫價能力，收入點可能提高呢？又點可能脫貧呢？古人話，授人以魚，不如授人以漁。要解決在職貧窮問題，關鍵係推動經濟多元化，改善就業市場環境，增加社會上流空間，如果唔係，就算成立乜嘢扶貧委員會，設立乜嘢關愛基金，都係治標不治本，盞嘥氣咋。

大家有眼見，港府咁多年嚟信誓旦旦話要扶貧，可惜眼高手低，愈扶愈貧，幫唔到基層市民，反而成為官僚無能嘅證據。冇計喇，港府無能，連樓市應唔應該減辣都搞到訊息混亂，鬧出笑話，旨意佢哋扶貧，不如望中六合彩好過喇。

計太一叮話齋，既然港產官僚無能力為基層解困，不如退位讓賢，返屋企飲紅酒、睇法國電影，唔好阻住地球轉，累人累物吖，叮！