「萬里清光不可思，添愁益恨繞天涯。」唐代詩人白居易描寫中秋夜思念故人嘅名句，形容南丫海難遺屬此刻嘅心情一樣咁貼切。慘劇發生接近三年，至今真相未明，沉冤未雪，有家屬坦言海難後每年中秋都好難過，為自己未能替家人討回公道而內疚，嗰種悲憤同無奈，真係聞者動容。

呢，事發後兩名肇事船長就話被判刑啫，但負有重大責任嘅海事處官員至今無人被問責，雖然兩名負責發牌同批圖則嘅海事處人員被檢控，使唔使負上刑責仲係未知之數。更離譜嘅係，家屬同律政司多番交涉，幾經辛苦至攞到手嘅事故調查報告，居然係「無字天書」，包括接受紀律調查嘅官員名單等重要內容被遮蓋，有家屬狠批律政司地位超然，隻手遮天，話會循民事追討，要求當局公開全份報告，又話會控告政府喎。

又唔怪得家屬咁（慶）嘅。運房局話就話公布咗十三名現職及四名已退休海事處人員涉嫌失職，並已就部分個案展開紀律程序，不過語焉不詳，紀律程序係咪包括名單上所有人員、紀律程序幾時展開、指控以至懲處內容，一概打死唔肯講。當局猶抱琵琶，遮遮掩掩，肯定有古怪，唔通又係官員私隱高於死難者嘅尊嚴？

有立法會議員就講得啱嘞，紀律處分原意係要懲處失職官員，令其他官員知所警惕，家陣當局臭屎密冚，唔單止對唔住死難者，對唔住家屬，更加無法挽回公眾對公務員隊伍嘅信心。嗱，咪畀人睇死，你慌今次唔係又搵幾隻代罪羔羊祭旗算數咩。

開講有話，錯就要認，打就企定。大家有眼見，世界各地每逢發生重大天災人禍，官員鞠躬下台係最起碼嘅承擔。之前南韓發生「世越號」海難，總理立即謝罪滾蛋；即使係內地，天津大爆炸死傷枕藉，安監總局局長等官員都冇得留低。反觀香港，死人冧樓又好，天跌落嚟都好，高官一樣可以毫髮無損。呢，南丫海難中嚴重失職嘅海事處前處長廖漢波穩坐釣魚船，早就退休咬長糧，逍遙快活去也。難為香港仲話實行「高官問責制」，「高官免責制」就差唔多。

為官之道，古有明訓︰「民不服我能，而服我公。」港產官僚施政無能，已經怨聲載道，如果再加埋處理海難官官相護，火上加油咯喎，莫講話激起更大民憤，泉下冤魂都唔會放過你哋吖，叮！

第一手消息請下載on.cc東網iPhone/iPad/Android/Windows Phone Apps