以前香港有唔少美譽，包括東方之珠、購物天堂、美食天堂等等，最近又多咗個花名「三少」。大家唔好誤會吖，呢個「三少」唔係排行第三咁解，而係指旅客少、生意少及景點少，講起都失禮。

即係咁，隨着旅客人數持續減少，旅遊業步入寒冬，連十一長假都要拍烏蠅，搞到商戶叫苦連天。而商務及經濟發展局局長蘇錦樑就有唔同講法，佢話訪港旅客人數仍然上升，十一長假期首日按年增加超過一成半，其中內地客增加逾一成六，非內地客亦增加近一成一喎。聽佢嘅語氣好似沾沾自喜咁，但呢啲數字究竟點樣得來，佢完全冇交代，你話信唔信得過吖？

以蘇錦樑嘅講法，訪港旅客人數大增，照計市面應該一片好景，商戶應該其門如市至係（口架），點解市道會咁冷清呢？點解商戶會叫苦連天呢？

嗱，口講無憑，本報記者去多個旅遊及購物旺區睇過，以前每逢長假都人滿為患嘅情況已經不復存在，唔少金舖及鐘錶店客流稀疏，連名店林立嘅尖沙咀廣東道亦冇咗以往嘅盛況。有藥房職員慨嘆，早前反水貨客示威大大影響生意，搞到內地人轉去其他地方，唔想再嚟香港。

冇錯嘞，世界上咁多地方可以旅遊及購物，內地人大把選擇，根本冇必要嚟香港受氣。正如旅遊界人士話齋，今年十一假期嘅酒店入住率明顯下跌，首日只有約八成，房價亦比去年下跌一至兩成，唔會再出現一房難求嘅情況。好明顯，唔少旅客即日往返，豪客冇晒影，消費力大減，就算整體人數真係好似蘇錦樑所講增加咗，亦係旺丁不旺財，得個睇字嘅咋，而且佢嘅數字唔知有冇水分添吖。

正所謂，一損俱損。旅遊業一池死水，唔止商戶無生意，連主題公園都唔好過。好似海洋公園咁吖，暑假至今入園人次少咗三成，預料成個十一假期內地客下跌一至兩成；昂坪纜車亦差唔多，客量較去年同期下跌近一成，焗住要出招吸客自救。

所以話，表面上旅客人數增長，實際上得個吉，當局與其沾沾自喜，不如諗辦法救亡好過喇。係人都知，內地客之所以對香港敬而遠之，主要因為激進組織不斷趕客，一時「鳩嗚」、一時「光復」，係人都怕怕喇。港府繼續坐視不理，香港唔止「三少」，遲早變成「三冇」添吖，叮！