屋署釘契竟連坐

呢嗱，喺二○一二年，長沙灣秀怡閣業主立案法團收到一份清拆令，原來係屋宇署下令清拆天台僭建物，並即時將大廈所有單位釘契。咁大劑，法團當然第一時間檢視清楚，發覺天台大部分由頂層單位業主擁有，法團僅佔天台約一百呎小巷嘅業權，確認無僭建物。

於是乎，法團鬆番一口氣，兩度去信要求署方澄清僭建物位置，要求撤銷釘契，以為可以好快擺平。點知急驚風遇着慢郎中，屋宇署一直懶理，直至去年初至通知法團，話發現天台搭建物由一戶業主擁有，於是撤銷釘契，拖到七月至發出正式嘅道歉信。

有冇搞錯呀，一戶僭建，要連累全幢樓業主孭飛，直情好似古代嘅「連坐」咁，唔通一個打工仔感冒，全公司員工都要被迫食藥？一個人開刀，要全醫院病人陪佢受一刀咯喎？有冇再荒謬啲呀！

講真，鬼叫你唔係高官咩，你睇貪曾當年被踢爆將開放式露台完全圍封，仲有前食物及衞生局局長周一嶽，亦將寓所露台圍封成僭建空間，高官權貴僭建成風，又唔見屋宇署咁神勇撲出嚟釘契喎，呢啲咪「釘契不上大夫」囉！

最慘嘅，永遠係無權無勢嘅老百姓，今次釘錯契事件，就有業主因急事需出售單位，弊在物業被釘，唔少人怕單位有手尾跟唔敢買。業主頻撲半年，晚晚瞓唔着咁滯，結果迫不得已要賤價八折出售物業，即使依家可以告到屋宇署甩褲，索回五十幾萬賣樓差價損失又點吖，咪又係官僚犯錯，納稅人埋單！

至於法團主席更加唔好過，試過喺街度畀業主指住鼻哥係咁鬧！難怪佢要問句:「點解要受呢啲苦？」

點解？好簡單，咪就係屋宇署官僚胡混度日，處事馬虎，劣迹斑斑，向來係申訴專員公署嘅常客。點講都好，物業係市民最重要嘅資產之一，唔少人窮一生打拚都係想有塊瓦遮頭，作為父母官，點可以咁無心無肺，冇查清僭建物業權就亂釘契，累人累物嘅呢！

計太一叮話齋，呢件事唔可以一句「唔好意思」就算，如果屋宇署死性不改依舊亂「釘」，唔好怪太一叮手下無情要狂「叮」呀！叮!