活化星光大道 重拾好客之道

呢，城規會尋日一錘定音，通過由康文署及新世界發展共同提出嘅活化尖沙咀海濱計劃。根據呢項需時三年嘅計劃，梳士巴利花園、星光大道及海濱花園一帶將進行擴建及活化，並劃分為「美食區」、「遊玩區」、「休閒區」以及「藝術及文化門廊」，新增設施包括觀景平台同綠化空間等。無可否認，呢項計劃本來幾吸引嘅，既可以成為新旅遊景點，亦可以為港人提供一個休閒好去處，本來以為冇乜爭議喇，點知一樣引起唔少質疑及批評，環保團體不滿港府冇公開招標，又認為唔符合海港規劃指引喎。

康文署又點解釋呢？該署話喎，今次活化計劃唔係地產或商業項目，港府冇賣過一吋土地，況且最終話事權冇畀到發展商，政府同合作機構喺項目裏面亦冇任何經濟利益。講就係咁講囉，但能唔能夠釋除公眾疑慮，排除各種阻力，仲要睇過至知，最怕橫生枝節，好事變壞事咋。

無論點講都好，星光大道已啟用十一年，一直無乜變化，設施又殘舊又乏味，除咗明星手印及雕像之外，根本冇嘢可以吸引人，係人都覺得悶喇，再唔搞搞新意思，都幾難留住旅客。

話時話，星光大道十年如一日，正正係香港景點千篇一律嘅縮影。好似維港咁吖，作為全球三大夜景之一，明明係寶貴嘅旅遊資源，弊在當局眼高手低，志大才疏，多年來一直聲稱要將維港發展成世界級海濱，點知得個講字，成個海岸線只有十分之一建有海濱長廊，簡直浪費天然資源。

所以話，本港旅遊業無以為繼，旅客買少見少，除咗因為激進組織趕客，以及人民幣貶值令港貨吸引力大減，另外一個主要原因就係旅遊設施乏善可陳，毫無吸引力可言。呢，七月訪港旅客按年大減逾百分之八，其中內地客急跌一成，創近年最大單月跌幅，就係一個嚴重警號。正如業界話齋，家陣唔單止係旅遊業嘅「寒冬」，直頭係「冰河期」，真係一啲都冇誇張o架！

始終都係嗰句，打鐵還需自身硬。要吸引旅客，最緊要自己爭氣，改善旅遊設施，重拾好客之道，先至可以自救，否則，盞被人唾棄，孤芳自賞嘅咋，叮！