天津爆炸揭漏洞 香港居安當思危

嗱，消防處係咁講嘅。今年截至上月底，已經向全港四千多個第二類至第十類危險品倉庫發出牌照。危險品倉庫要申請牌照，必須通過建築物結構、防火裝備等五大範疇嘅風險評估，危險品儲存量超過五百公噸嘅，更加需要申請環境許可證、提供環境影響報告以及人命傷亡報告添。處方又大派定心丸，話家陣大部分危險品倉庫設喺工廠大廈，遠離民居，仲話今年以來進行過四千五百幾次巡查，提出八十多宗涉及危險品嘅檢控喎。

唔知大家點睇，太一叮就唔係咁放心嘞。係人都知，好多工廠大廈位處人口密集嘅地區，除非唔出事，否則後果可大可小。今次爆炸嘅天津危險品倉庫距離民居六百米，尚且造成咁多人死傷，何況本港好多工廈直情喺民居隔籬添。

天津大爆炸固然凸顯國產官僚安全監管甩甩漏漏，其實港產官僚都唔好得幾多。早年油價高企，非法油缸車大行其道，消防處居然闊佬懶理，由得呢啲流動炸彈通街走，冇爆大鑊算好彩。又好似早前造成三人死亡嘅慈雲山車房大爆炸咁吖，業界一直要求當局對車房進行發牌規管，點知你急官唔急，拖咗十幾年仲未有下文；最離譜嘅係，負責把關嘅機電署近兩年淨係抽查全港車房五百次，實際檢控更加只有一宗咁大把。你話嘞，官僚敷衍塞責，執法求其，有乜法子唔出事吖。

更加得人驚嘅係，家陣全港約有三成車房位處住宅區內，部分舊區更加開到成條街都係，有人形容呢啲車房其實係計時炸彈，真係一啲都冇誇張o架。雖然當局亡羊補牢，要求車房遷離民居，但被業界批評影響生計，搞到怨聲載道。呢啲咪就係平時唔燒香，臨急抱佛腳造成嘅惡果囉。

當然喇，香港消防隱患多多，都市炸彈處處，車房只係冰山一角咋。村屋、劏房、舊樓……違規改建有之，消防設施殘破有之，五花八門，無奇不有，咁多年來意外不絕如縷，不知造成幾多人命傷亡。

始終都係嗰句，禍不入慎家之門。消防安全關乎人命，梗係小心駛得萬年船喇。唔該港產官僚打醒十二分精神，做好自己份工，唔好又等到死人冧樓至補鑊吖，叮！