誤班補償大細超 國泰醜聞鑊鑊甘

唔係靠嚇o架。前日國泰一架由新加坡飛香港嘅航機，起飛後冇耐，機長突然廣播話飛機着火，要緊急折返。雖然最後平安着陸，國泰大派定心丸，強調只係防止引擎過熱嘅裝置出現問題，機艙並冇起火或冒煙喎。不過咁，乘客嚇餐飽，呢條數又點計先？

話時話，國泰問題多多，類似驚險情節已經唔係第一次咯。之前試過飛行途中機艙探測出煙霧，搞到要緊急降落美國阿拉斯加軍用機場；今次又話引擎過熱，下次唔知又搞邊科。國泰近年話就話冇發生重大安全事故，但一次好彩唔代表永遠好彩，再咁落去，冇人敢擔保唔會出事o架。

當然喇，國泰服務不斷插水，有口皆悲，除咗安全問題令人提心吊膽，航班延誤更加係家常便飯，有人試過四日內分乘三班國泰航機，中正延誤三重彩，真係唔到你唔服。旅客行程大失預算，本來已經一肚氣，點知國泰事後補鑊又安排失當，更係火上加油。呢，前日一班由意大利米蘭飛本港嘅航班，原定凌晨起飛，當大批旅客準備登機嘅時候，職員突然宣布因內部調動而延飛，結果拖咗八粒鐘至起飛。延誤都算嘞，最離譜係國泰居然玩大細超，外籍旅客獲免費安排入住酒店，而港客就只獲免費的士往返機場。開頭國泰仲死撐，話因為酒店供應緊張喎，其後有見眾怒難犯，先至一視同仁咋。

真係諗極都唔明，大家一樣畀咁多錢，點解洋人受到優待？唔通外國嘅月亮真係特別圓？難為國泰開口埋口「香港人嘅航空公司」，其實同慈禧太后「寧贈友邦，不予家奴」冇咩分別嘅咋。

冇計喇，國泰係就係「香港之光」，不過已經係好耐之前嘅事咯。該公司近年醜聞不絕，亂象叢生，特別係內部管理不善，勞資糾紛無日無之，員工士氣低落，以致服務不斷插水，全球排名急跌，連最佳航空公司嘅桂冠都要拱手讓人，「香港之光」淪為「香港之恥」，講起真係可悲。

正所謂，物必先腐而後蟲生，國泰盛極而衰，逐漸走向沒落，講到尾都係因為自己唔爭氣。正如成個香港一樣，不思進取，內耗不斷，想有運行都幾難喇，叮！