政壇：電動車老闆 話火星係故鄉
馬斯克（Elon Musk）係邊位？咪係電動車龍頭Tesla（特斯拉）老闆。唔識？咁《Iron Man》套戲識嘞啩，主角Tony Stark寸到爆，導演同扮演Stark嗰位羅拔唐尼都話，靈感就係嚟自馬斯克。呢位真實版Iron Man乜都敢講敢做，佢最近上咗個Talk Show，講咗呢啲……
馬斯克
啲科技公司總有啲非一般嘅嘢放喺辦公室，好似乒乓球枱或者滑梯咁，咁Tesla呢？馬斯克話打算整個過山車，等大家上落方便啲同開心啲喎。方便啲？而講到當年福特阻Tesla新系列命名Model E，馬斯克好躁咁話「做乜偷我哋Tesla嗰『E』字，似足法西斯軍隊操入芝麻街做字母賊！」
講到點將火星暖化到適合人類居住，佢話「最快捷係用核武炸落去……」火星又關佢事？關o架，佢另外有檔太空探索生意SpaceX，仲同美國太空總署合作，佢仲講過話要死喺火星添！
咁點上太空先﹖佢話早喺十幾年前已經去過俄羅斯三次，就係為咗買導彈上太空。導彈？哦，其實佢係原本想買支火箭，但太貴，所以想買兩支導彈，然後拆咗個彈頭用。不過，最後佢都係自己整。
驚你仲未識佢，嗱，Tesla係佢嘅、SpaceX係佢嘅、PAYPAL都係佢創嘅，總之你諗到諗唔到嘅高科技都關佢事，連火星都係佢嘅？事關有人話佢努力搞太空船，係為咗返佢故鄉火星喎。
