城中鏡：專業Band騷
眾所周知，香港律師會前會長Huen王桂壎彈得一手好結他，但原來佢仲好唱得。早幾日Huen就同太太Angela吳美霞聯同城中一班音樂造詣非凡嘅專業人士，齊齊拉大隊去油麻地廟街街頭表演。Huen話呢次活動籌備咗足足成年，除咗幫助區內一天主教教會招募義工外，更可以順便娛樂街坊，一舉兩得。當晚大律師公會主席譚允芝都有嚟捧場打氣。
王桂壎（左一）籌備廟街街頭表演近一年，終於成功開騷。
林國輝（左）負責彈結他，譚允芝都嚟捧場打氣。
憶父當年剪爛喇叭褲
講起當年夾Band，Huen話冇屋企人反對，只係爸爸唔鍾意佢一身嬉皮士造型。有次佢一瞓醒仲發現家中啲喇叭褲畀爸爸剪爛晒，後來佢爸爸知道玩音樂可以搵到錢，先慢慢接受，但佢至今都笑言好彩當年冇入錯行。至於當晚擔任鼓手嘅浸信會醫院腫瘤中心主任傅惠霖，就話當年家人冇反對佢夾Band，仲好支持佢玩音樂添，佢又勉勵年輕人只要讀書成績好，父母唔會干預佢哋興趣喎。
當晚Huen夥拍另一女大律師鍾凱婷獻唱，配合名為「Very Interesting Professional Band」嘅樂隊演奏，全晚氣氛高漲。該樂隊成員亦個個都係專業人士兼大有來頭，結他手就有醫學會前會長謝鴻興、牙醫學會會長梁世民、大律師公會執委林國輝，琴鍵手則為屯門醫院外科部副顧問醫生謝得言。
由頭唱到尾嘅謝鴻興話，咁多種樂器當中，結他同鋼琴都可以自彈自唱，但鋼琴難以攜帶出外，所以佢獨愛結他。Angela就自稱卡拉ＯＫ歌手，笑笑口話家中浴室係佢練歌嘅最佳地方。
