旅遊業坐困愁城 政治化雪上加霜

呢，澳門第二季旅客總消費額比去年同期大跌超過兩成；香港亦唔好得去邊，七月份旅客按年下跌達百分之八，其中內地客更跌近一成。旅客下跌，零售業不景，自然拖累整體經濟，本港八月份採購經理指數跌至四十四點四，創六年多以來新低，而且係連續六個月低於盛衰分界線，顯示整體經濟環境急劇惡化，尤其訪港旅客減少，更令企業訂單大跌，都咪話唔大鑊。

唔同嘅係，面對旅客人數下跌，澳門當局主動出擊，希望盡快收復失地，短期內將公布連串推廣活動。反觀港府束手無策，一味等運到。高官引述北大人話，本港反水貨客等活動傷害咗內地旅客感情，有唔少彌補工作要做，港府會繼續同業界商討如何補鑊喎。高官仲話，要重新吸引內地客，最重要係營造氣氛，令旅客知道香港仲係好客之都，呢方面一定要港人自己落手落腳做，中央想幫都幫唔嚟。

冇錯嘞，旅客出得嚟旅遊同消費，都係想開開心心，輕輕鬆鬆啫，邊個想受到歧視o架。不過講就咁講，最怕樹欲靜而風不息，激進分子唯恐天下不亂，根本唔會同你客氣。大家有眼見，喺泛政治化之下，連足球比賽都演變成政治事件，加劇兩地矛盾，問你服未。呢嗱，激進團體又揚言發動反水貨示威，「光復」鬧劇隨時死灰復燃，喺咁嘅環境下，旅客有乜可能上門吖。

講開又講，香港愈來愈政治化，有啲人郁啲就上綱上線，點止足球比賽變質變味吖。好似擴建星光大道咁，改善景點，吸引旅客，明明對大家都有好處，點知一樣拗餐飽。成個社會紛紛擾擾，吵吵鬧鬧，係人都怕怕，難為有人仲要求中央增加個人遊城市，吸引高質素旅客喎。嗰頭將「一簽多行」改為「一周一行」，呢頭又話要增加個人遊城市，你話係咪神經錯亂吖。

始終都係呢句，此處不留人，自有留人處。世界上好玩好客嘅地方多的是，內地旅客根本冇必要來香港貼錢買難受。咪話太一叮唔提醒吖，香港繼續自我陶醉，以為自己係皇帝女唔憂嫁，遲早玩死自己嘅咋，叮！