台灣黑糖可致癌 兩岸奸商毒鬥毒

呢嗱，南京警方呢頭啱啱破獲製售假冒北京同仁堂安宮牛黃丸嘅工場，嗰頭台灣又爆出黑糖含致癌物嘅醜聞，你方唱罷我登場，問你怕未。係咁嘅，台灣媒體近日抽驗市面十九件黑糖產品，結果全部驗出含有致癌物「丙烯醯胺」，其中一個樣本如果用嚟製作一杯奶茶，已經超過一個成年人每日建議攝取量，都咪話唔恐怖。

係人都知，安宮牛黃丸係搶救急重病嘅常用中藥，被譽為中風「急救神丹」，病人誤服假藥，隨時救命變奪命。至於黑糖含致癌物，同樣唔講得笑，動物實驗發現，呢種致癌物會損害生殖、神經等系統，大量攝取可導致食道癌、腦瘤、甲狀腺癌及腎臟癌。大家都知啦，黑糖含豐富鐵質同鈣質，被視為具補血養氣之效，好多人當保健品服用，所以咯喎，黑糖製作嘅奶茶、剉冰及饅頭等食品近年除咗喺台灣大行其道，大陸同香港亦愈來愈流行，點知原來危機重重，養生變慢性自殺，唔驚就假。

所以話，天下烏鴉一般黑，天下奸商一樣毒。大陸無食不毒，無物不假，早就臭名遠播，鎘大米、蘇丹紅蛋、孔雀石綠魚、三聚氰胺奶，五花八門，無奇不有。估唔到台灣亦唔執輸，近年來食安醜聞不絕如縷，坑渠油、塑化劑、瘦肉精，兩岸不分彼此，五十步笑百步嘅咋。

當然喇，香港亦唔好得去邊。就講最新呢單假冒安宮牛黃丸吖，原來幕後主腦係香港人，由佢提供藥方，然後喺內地搵人製造，中港奸商合作無間，害人不淺。仲有吖，流通兩岸三地嘅坑渠油，部分原料來自香港，你話醜唔醜怪吖。所以話，中國人內鬥內行，外鬥外行，黑心食品假冒藥品互通有無，十幾億中國人自相殘殺，講起都悲哀。難為有啲香港人仲唔承認自己係中國人，其實講到唯利是圖、見錢開眼嘅劣根性，大家係同一基因，想唔認都唔得。

點講都好喇，兩岸頻頻爆發食安危機，香港都幾難獨善其身，特別係台灣食品受到唔少港人歡迎，問題黑糖製品究竟有冇流入本港，睇怕連港府都矇查查，唔該港產官僚醒醒定定，唔好又等到爆大鑊至亡羊補牢吖，叮！