政壇：搞搞政：港區人大換屆 隨時鬧女人荒

蔡素玉掹車邊逐連任

現時九名港區人大女將之中，劉佩瓊、梁劉柔芬、范徐麗泰同譚惠珠，去到一七年底已七十二歲，唔合乎參選資格。其實本身係人大常委嘅范太、擔任團長嘅譚惠珠及梁劉柔芬，已先後表明唔會再參選，即使其他人未表態，都會尊重制度。此外，史美倫同劉健儀到一七年亦分別六十八歲及七十歲，同樣要退下火線，據聞羅范椒芬去向未明。換言之，下屆可能只有蔡素玉同顏寶鈴留低，其中蔡素玉以六十七歲之齡，可以「掹車邊」報名競逐連任。

有人擔心相關人大一下子全退會青黃不接，尤其譚惠珠係基本法起草委員會委員，現時相關委員已所剩無幾，將來遇到有關《基本法》問題，喺芸芸人大之中，恐怕已冇權威人士可解答到。另一原因係有潛質接棒嘅女性亦不多。

近期政圈中流傳幾名人選，包括立法會議員梁美芬、黃大仙區議員陳曼琪，兩者嘅共通點都係法律界人士，符合參選人大嘅條件。現年五十三歲嘅梁美芬喺人大圈子中屬年輕一群，師承《基本法》四大護法之一嘅許崇德，平日有相當的曝光率，唔少人認為佢有望接棒。陳曼琪喺舊年佔領行動時常企出嚟批評佔領行動破壞法治，更代表潮聯小巴公司申請旺角禁制令，人氣急升。