難民村民成水火 皆因官僚埋災禍

唔係誇張o架，睇吓元朗嘅亂象，就知道難民問題有幾嚴重。上個月之嘛，被列為一級歷史建築嘅元朗水頭村長春園被人縱火，逾百幾年歷史嘅水車燒成灰燼，懷疑就係非洲裔酷刑聲請漢所為。雖然疑犯已被警方拘捕，但呢啲所謂難民愈聚愈多，治安愈來愈差，村民人心惶惶，都咪話唔閉翳。

淨係八鄉錦田一帶咋，目前就有約四千名難民聚居，唔少經常流連村內，唔係飲酒鬧事，就係撩是鬥非，月前仲發生南亞裔難民互毆事件添，村民唔驚就假。正如區議員話齋，好多難民一方面提出免遣返聲請，每月得到港府人道援助，一方面打黑工，喺附近廢車場或回收場搵食，又食又拎，擺明搵香港笨。其實，又食又拎仲係小事，難民帶來各種社會及治安問題至係大件事。

即係咁，唔好一竹篙打一船人，唔係個個難民都有問題，但部分難民確實經常惹是生非，甚至作奸犯科，好難令村民接受囉。最好笑嘅係，當區民政事務處嘅官員成日話要種族共融，要求村民同難民融洽相處，點知淨係得個講字，有人權團體要求當局協助難民同村民溝通，個個耍手擰頭，關人個關。呢嗱，記者向民政事務總署查詢點樣改善難民同村民嘅關係，發言人居然話村內治安由警方負責喎，你話係咪九唔搭八吖。

係人都知，呢啲酷刑聲請者九成九以上係假難民，舊年入境處審核嘅幾千宗個案中，只有十幾宗成立咋。當局話就話設立統一審核機制，加快甄別程序，希望疏導滯港嘅假難民，結果適得其反，酷刑聲請累積個案不斷增加，家陣已經突破一萬大關，每個月平均增加幾百宗。假難民易請難送，而且識得走法律罅，滯港時間短則幾年，長則十幾年，搞到港府人道援助支出年年上升，今個年度已超過六億元，再咁落去，香港就算唔陸沉，都遲早乾塘喇。

好明顯，假難民問題之所以尾大不掉，皆因港府假仁假義。家陣連歐洲國家都大幅收緊難民政策，唯獨香港繼續中門大開，港府講得好聽叫人道主義，其實根本就係靠害港人。當年越南難民問題搞到香港雞毛鴨血，唔通港府咁快就忘記教訓？叮！