東網電視
更多新聞短片記得律政司今年六月底講過，會喺三個月內決定是否檢控「貪曾」前特首曾蔭權爵士。貪曾尋晚出席一個酒會時，喺台上先後同多名特區高官及工商界人士祝酒碰杯，但唯獨不敢行近律政司司長袁國強，明顯心裏有鬼。貪曾被追問可能快將被檢控時，更喺G4警員護送下快閃離開，前後到場只有十幾分鐘。最搞笑係，G4竟將貪曾帶到一個通往酒店廚房嘅門口離開，莫非冥冥中注定貪曾將要「落鑊」？
貪曾（前排中）出席工商界十．一酒會，喺中總會長楊釗（右）致詞時擔天望地、表情古怪，有欠尊重。
貪曾被問及會否擔心被檢控時，即「走後門」快閃。
貪曾所走嘅後門後方為酒店廚房，「落鑊」味濃。
避忌唔行近律政司
多個商會尋日喺港島香格里拉酒店舉辦十．一酒會，嘉賓之一嘅貪曾等到接近六時半、即儀式開始前一刻先到場。佢一入場就行咗上台，起初同企喺佢右手邊嘅袁國強只相隔一位嘉賓。其後財政司司長曾俊華亦到場，袁國強立即拉住曾俊華企喺其左方，明顯想同貪曾「企遠啲」。到祝酒環節，貪曾先後與特首梁振英及曾俊華等人碰杯，唯獨係無行去袁國強嘅方向，相當避忌。
貪曾落台後，記者上前問佢三個月檢控限期將至，會否擔心被起訴？佢嘻皮笑臉地拋下一句：「你真係好好笑！」然後更喺G4護送下急步「走後門」離開。不過，未知係預先準備抑或事有湊巧，貪曾所走嘅後門，竟然係一道通往酒店廚房嘅側門，狼狽之餘增添一陣「鑊」味。
第一手消息請下載on.cc東網
